Федералдық апелляциялық сот Президент Дональд Трамптың туған жер бойынша азаматтық алу құқығын жоюға бағытталған бастамасын Конституцияға қайшы деп танып, бұл саясаттың АҚШ аумағында күшіне енуіне кедергі келтірген төменгі сот шешімін бекітті.

АҚШ-тың Тоғызыншы апелляциялық соты Трамптың АҚШ-та туған, бірақ АҚШ азаматы емес ата-ананың баласына автоматты түрде азаматтық беру жүйесін тоқтатуға бағытталған атқарушы бұйрығы Конституцияға сәйкес келмейтінін мәлімдеді.

Бұл шешім Нью-Хэмпшир штатындағы федералды судьяның дәл сол бұйрықты заңсыз деп тауып, бүкіл ел аумағына тыйым салған бұрынғы үкімімен сәйкес келеді.

Енді бұл іс ондаған жылдар бойы бұл мәселеге тікелей араласпаған Жоғарғы Соттың қарауына берілуі мүмкін.

Туған жер бойынша азаматтық деген не?

Туған жер бойынша азаматтық Америкада дүниеге келген әр адамның АҚШ азаматы болып есептелетінін білдіреді.

Бұл тәжірибе Азамат соғысынан кейін бірден басталды, Конгресс Конституцияның 14-түзетуін қабылдағаннан бері қолданыста.

Аталған түзетуде: «АҚШ-та туған немесе азаматтыққа қабылданған және елдің юрисдикциясына бағынатын барлық адамдар АҚШ азаматтары болып табылады» деген сөйлем бар.

Трамп қаңтар айында қол қойған президенттік жарлық АҚШ-та заңсыз немесе уақытша тұрып жатқан адамдардың балаларына азаматтық беруді тоқтатуды көздейді.

Бұл президенттің қатаң көші-қон саясатының бір бөлігі болып табылады, ол туған жер бойынша азаматтықты «заңсыз көші-қонды ынталандыратын магнит» деп атаған болатын.

Трамп пен оның жақтастары түзетудегі «елдің юрисдикциясына бағынатын» деген тіркеске сүйене отырып, бұл АҚШ-та заңсыз жүрген әйелдерден туған балалар азаматтық ала алмайды деп есептейді.

Алайда кейбір федералдық судьялар бұл тұжырыммен келіспей, бұйрықтың күшіне енуіне кедергі келтіретін ел аумағына таралатын тыйым салу шешімдерін шығарды.