Халықаралық қылмыстық сот Орталық Африка Республикасында он жыл бұрын болған діни қақтығыстар кезінде жасалған көптеген соғыс қылмысы мен адамзатқа қарсы қылмысы үшін екі көтеріліс басшысын ұзақ мерзімге бас бостандығынан айырды.
Сот Патрис-Эдуар Нгайссонаны 12 жылға, ал Альфред Екатомды 15 жылға соттады. Екеуі де 2013 жылдың қыркүйегі мен 2014 жылдың ақпаны аралығында ел астанасы Банги маңында мұсылман бейбіт тұрғындарға шабуыл жасаған «Anti-Balaka» жасағының жоғары деңгейдегі қолбасшылары болатын.
Сот үкімі кісі өлтіру, бейбіт тұрғындарға шабуыл жасау, азаптау, қудалау және күштеп қоныс аударту сынды көптеген айыптарды қамтыды.
«Anti-Balaka» жасақтары 2013 жылы басым көпшілігі мұсылмандардан құралған «Seleka» көтерілісшілер тобы президент Франсуа Бозизені биліктен тайдырғанынан кейін «Seleka-ға қарсы соғыс бастап, бүкіл ел бойынша ауқымды зорлық-зомбылықтың өршуіне себеп болған еді.
Сот «Anti-Balaka»-ның жетекшісі болған Патрис-Эдуар Нгайссонаның Франсуа Бозизені билікке қайтару және «Seleka» күштерінен кек алу мақсатындағы операцияларды жоспарлағанын мәлімдеді.
Бұрынғы қолбасшы Альфред Екатомның өз қарулы бөлімшесін толықтай бақылауда ұстағаны және басқа топтармен ұйымдасып шабуылдар жасағаны анықталды.
Алайда сот куәгерлердің мәлімдемелеріне сүйене отырып, «қақтығыс бастапқыда діни сипатта болмаған» деп шешті. Мұсылман және мұсылман емес куәгерлер соғысқа дейін әртүрлі қауымдастықтың бейбіт түрде бірге өмір сүргенін мәлімдеді.
Іс 2021 жылы басталып, айыпталушылар өздеріне тағылған айыптарды мойындамаған болатын.
