Ресми өкілдер 2026 жылғы Әлем чемпионаты кезінде қызмет атқаратын робот-иттердің Мексика полициясына қылмыспен күресуге көмектесетінін хабарлады.
Робот-иттер қауіпті аймақтарға кіріп, қауіпсіздік күштеріне тікелей бейнекөріністерді жіберетіндей етіп жобаланады. Қауіпсіздік күштері футбол турнирі кезінде осы бейнежазбаларды бақылап, қажетті шараларды қабылдай алады.
11 маусым мен 19 шілде аралығында өтетін турнирді Мексика, АҚШ және Канада бірлесіп өткізеді. Монтеррей метрополитен аймағында орналасқан және Әлем чемпионатының матчтарын қабылдайтын Гуадалупе муниципалитеті жануарға ұқсас бұл роботтарды 2,5 миллион песоға (145 мың доллар) сатып алды.
Жергілікті әкімдік жариялаған видеода роботтардың бірі иесіз қалған ғимаратта төрт аяғымен жүріп, баспалдақпен қиындықпен болса да көтеріліп бара жатқаны көрсетілген. Кадрларда робот-иттің артында үнсіз келе жатқан бір топ полиция қызметкеріне тікелей эфирде көрініс таратып жатқаны байқалады.
Көрсетілім кезінде робот-ит қарулы адамға кезігіп, дауыс күшейткіш арқылы оған қаруын тастау туралы ескерту жасады. Гуадалупе мэрі Гектор Гарсия робот-иттердің мақсаты «полиция қызметкерлеріне алғашқы әрекет кезінде қолдау көрсету және олардың физикалық қауіпсіздігін қорғау» екенін айтты. Ол сондай-ақ роботтардың «кез келген төбелес немесе қақтығыс жағдайында» іске қосылатынын айта кетті.
Турнир кезінде «Estadio Monterrey» деп аталатын BBVA стадионында төрт матч ойналады.
