Украина бұл дрондардың 460-ын және 19 зымыранды атып түсірді. Сонымен қатар Украина Саваслейка әуе базасында екі ресейлік әскери ұшаққа соққы берді.

Украина Әуе күштерінің хабарлауынша, бұл ауқымды шабуыл Ресей бітімге келу туралы үндеулерді қабылдамай отырған сәтте жүзеге асқан.

Шабуыл Украинадағы бірнеше өңірге залал келтіргенімен дүйсенбіге қараған түнде адам шығыны немесе жаппай жарақаттану жағдайлары тіркелмеген.

Украина Әуе күштері: «Жау 10 түрлі нүктеден әуе шабуылы жасады», – деп мәлімдеді.

Батыста орналасқан Ровно қаласының мэрі Александр Третьяк бұл шабуылды «соғыс басталғалы бері өңірге жасалған ең ірі шабуыл» деп сипаттады.

Ресей соңғы апталарда Украинаға қарсы шабуылдарын күшейткен шақта Киев билігі бұл әрекеттердің Мәскеудің үш жылға созылған соғысты тоқтатуға ниеті жоқ екенін және бейбіт келіссөздерге байыппен қарамайтынын көрсетіп отырғанын мәлімдеді.

Қарқынды шабуылдар Украинадағы онсыз да зор салмақ түскен әуе шабуылына қарсы қорғаныс жүйесінің мүмкіндіктеріне қатысты алаңдаушылықты күшейтті.

Соған қарамастан Украина Әуе күштері түн ішінде ұшырылған 460 дронның және 20 зымыранның 19-ының жойылғанын немесе залалсыздандырылғанын хабарлады.

Украина сондай-ақ Ресейге тиесілі ұшқышсыз ұшу аппараттарына арналған бөлшектер шығаратын электронды зауытқа да түн ішінде шабуыл жасағанын хабарлады. Жергілікті ресейлік лауазымдылар шабуылдан кейін кәсіпорын уақытша өндірісті тоқтатуға мәжбүр болғанын растады.

Ұшақтар түні бойы жойылды

Сонымен қатар Украина әскері түн ішінде Ресейдің Саваслейка әуе базасында екі әскери ұшағына соққы жасағанын хабарлады.

Дүйсенбі күні жасалған мәлімдемеде: «Алдын ала мәліметтер бойынша, МиГ-31 және Су-30/34 екені болжалған екі жау ұшағы нысанаға алынды», - делінген.