Тегеран АҚШ-тың ирандықтар мен негізінен Таяу Шығыс пен Африка елдерінен шыққан 11 елдің азаматтарына енгізген саяхат шектеуін айыптап, Вашингтонның бұл шешімін "нәсілшілдік ой-сананың белгісі" деп атады.

Иран Cыртқы істер министрлігінің шетелдегі азаматтар істері жөніндегі бас директоры Алиреза Хашеми-Ража 9 маусымда күшіне енетін бұл шараны "америкалық саясаткерлер арасында үстемдік пен нәсілшілдік ой-сананың басым екенін анық көрсетеді" деп сипаттады.

Министрлік таратқан мәлімдемеде ол бұл шешім "америкалық шешім қабылдаушылардың ирандық және мұсылман халқына деген терең дұшпандығын көрсетеді" деп қосты.

АҚШ президенті Дональд Трамп сәрсенбі күні Колорадо штатындағы Израильді қолдау митингінде болған өрт шабуылынан кейін ұлттық қауіпсіздік негізінде өзінің алғашқы мерзіміндегі саяхат шектеуін жаңғыртатын жарлыққа қол қойды.

Хашеми-Ража бұл саясат "халықаралық құқықтың негізгі қағидаларын бұзады" және "миллиондаған адамды тек олардың ұлты немесе діні негізінде саяхаттау құқығынан айырады" деп мәлімдеді.

Сыртқы істер министрлігінің өкілі бұл тыйымның кемсітушілік екенін және "АҚШ үкіметіне халықаралық жауапкершілік жүктейтінін" айтты, бірақ егжей-тегжейлі түсіндірмеді.

Трамптың тыйымы

Ираннан басқа, АҚШ-тың тыйымы Ауғанстан, Мьянма, Чад, Конго-Браззавиль, Экваторлық Гвинея, Эритрея, Гаити, Ливия, Сомали, Судан және Йемен азаматтарын қамтиды. Басқа жеті елдің азаматтарына ішінара тыйым салынды.

Иран Сыртқы істер министрлігінің мәліметі бойынша, 2020 жылы АҚШ-та шамамен 1,5 миллион ирандық болған.