Израильдің қатаң шектеулеріне қарамастан Рамазан айының алғашқы жұма намазына Иерусалимнің шығысындағы басып алынған Әл-Ақса мешітіне шамамен 90 000 палестиналық жиналды.
«Әл-Ақса мешітіндегі жұма намазына шамамен 90 000 адам қатысты», – деді Иерусалимдегі Ислам Қорының Бас директоры Шейх Аззам әл-Хатыб Анадолы агенттігіне берген сұқбатында.
Мешіттің айналасында және Иерусалимнің Ескі қаласының барлық жерінде ғибадат етушілердің кіруін шектеу үшін көптеп полиция орналастырылды. Бейсенбі күні Израиль полициясы жұма күні Шығыс Иерусалимде 3000 офицер орналастырылатынын мәлімдеді. Израиль билігі басып алынған Батыс Шериядан Иерусалимге жетуге тырысқан ғибадат етушілерге қатаң шектеулер енгізді.
Куәгерлер Анадолы агенттігіне Израиль әскері Иерусалимді қоршаған әскери бақылау бекеттерінен өтуге тырысқан ондаған мың палестиналықты тоқтатқанын айтты.
Бейсенбі күні Израиль премьер-министрінің кеңсесі мешітке тек 55 жастан асқан ерлер мен 50 жастан асқан әйелдер және 12 жасқа дейінгі балалар ғана кіре алатынын хабарлаған болатын. Ғибадат етушілерге алдын ала қауіпсіздік рұқсатын алу және арнайы бақылау бекеттерінде тексеруден өту талап етілді.
Осы шектеулерге қарамастан Иерусалимнен және Израильдегі араб аудандардан келген палестиналықтар мешітке жиналды. Әл-Ақса күзетшілері және қауіпсіздік топтары сияқты еріктілер ғибадат етушілерге көмек көрсетті.
Жұма уағызында Әл-Ақса мешітінің имамы Мұхаммед Селим Мұхаммед Әли ғибадат етушілердің шектеулерге қарамастан мешітке жетуге деген табандылығын мақтап, қасиетті орынды қорғауға және жиі келуге шақырды. Намаз соңында ғибадат етушілер Газа мен басып алынған Батыс Шерияда Израиль күштері тарапынан өлтірілген палестиналықтардың рухына жаназа намазын оқыды.
2023 жылдың 7 қазанында Газаға қарсы соғыс басталғаннан бері Израиль билігі Батыс Шериядан Шығыс Иерусалимге палестиналықтардың кіруін шектейтін қатаң шаралар енгізген болатын.
Палестиналықтар бұл шектеулерді Израильдің Шығыс Иерусалимді, соның ішінде Әл-Ақса мешітін иудаизациялау және оның арабтық әрі исламдық болмысын жоюға бағытталған кең ауқымды әрекеттерінің бір бөлігі деп санайды.
