Мексика үкіметінің бұрынғы премьер-министр Бетсси Чавеске саяси баспана беру процесін бастауы Перу Сыртқы істер министрі Уго де Зеланың айтуынша, «достыққа жат қимыл» ретінде сипатталды.

Перу бұрынғы президент Педро Кастильоның 2022 жылғы төңкеріс жасау әрекетіне қатысы бар деген айыппен тергеліп жатқан бұрынғы премьер-министрге саяси баспана берген Мексикамен дипломатиялық қатынастарын үзді.

Перу Сыртқы істер министрі Уго де Зела дүйсенбі күні өткізген баспасөз мәслихатында
«Бүгін біз бұрынғы премьер-министр Бетсси Чавестің бұрынғы президент Педро Кастильоның төңкеріс жасау әрекетіне қатысы бар деген айыппен Мексика Елшілігінің резиденциясынан саяси баспана алғанын таңданыс әрі терең өкінішпен қабылдадық», – деді.

Ол сондай-ақ: «Бұл — достыққа жат әрекет. Аталған елдің қазіргі және бұрынғы президенттерінің Перудің ішкі істеріне қайталанған араласуын ескере отырып, Перу үкіметі бүгіннен бастап Мексикамен дипломатиялық қатынастарды үзу туралы шешім қабылдады», – деп қосты.

Бұрын ауыл мұғалімі және кәсіподақ жетекшісі болған Кастильо «Перу тарихындағы кедей отбасынан шыққан алғашқы президент» ретінде белгілі еді. 2022 жылдың желтоқсанында бірнеше айға созылған саяси дағдарыстан кейін Конгресті таратуға әрекет жасағаны үшін қызметінен босатылған.

Кастильо қызметінен кеткеннен кейін Лима мен Мехико арасындағы қатынастар күрт нашарлады. Перу Мексика Кастильоның әйелі мен балаларына саяси баспана берген соң Мексика елшісін елден шығарып жіберді.

Кастильоның ізбасары қазіргі Президент Дина Болуарте де сол кездегі солшыл Мексика президенті Андрес Мануэль Лопес Обрадорды Кастильоны қолдап, Перудің ішкі істеріне араласты деп айыптап, Перудің Мексикадағы елшісін елге уақытша қайтарып алған болатын.

Кастильо отбасымен бірге Мексика елшілігіне баспана сұрауға бара жатқан кезінде ұсталып, бүлік пен өкілеттігін теріс пайдаланды деген айыптармен қамауға алынған.

Чавес те сол іс бойынша айыпталып, сотқа тартылған; екеуі биылғы наурыз айында сот алдына шыққан. Кастильо қызметінен босатылғаннан бері қамауда отыр, ал Чавес кепілмен босатылған.

Прокурорлар Конгресті тарату жоспарына қатысқан деген айыппен Чавеске 25 жыл, Кастильоға 34 жыл түрме жазасын сұрап отыр.

Кастильо өзіне тағылған айыптарды жоққа шығарып, мемлекетке қарсы қару қолданбағанын, төңкеріс әрекетінің сәтсіз болу себебі әскердің оның бұйрықтарын орындаудан бас тартқаны екенін айтады.