«Оңтүстік Корея, АҚШ және Жапония 11 шілде күні Солтүстік Кореяның ядролық және зымыран қауіптерінің артуына қарсы бірлескен әрекетті күшейту мақсатында ортақ әуе жаттығуларын өткізді», - деп хабарлады Оңтүстік Кореяның Қорғаныс министрлігі.
«2025 жылы алғаш рет АҚШ-тың «B-52H» стратегиялық бомбалаушы ұшағы Солтүстік Кореяның ядролық және зымыран қауіптеріне қарсы күш көрсету мақсатында өткізілген жаттығуға қатысу үшін Корей түбегіне орналастырылды», - деп мәлімдеді Оңтүстік Кореяның Қорғаныс министрлігі.
Жергілікті «Yonhap» жаңалықтар агенттігі «Жаттығу Оңтүстік Кореяның Чеджу аралы маңындағы халықаралық әуе кеңістігінде өткізілді және оған Оңтүстік Кореяның «KF-16», Жапонияның «F-2» әскери ұшақтары мен АҚШ-тың стратегиялық бомбалаушы ұшағы қатысты», - деп хабарлады.
Бұл оқу-жаттығу 18 маусымдағы жаттығулардан кейін бір ай өткен соң өтті және Оңтүстік Корея президенті Ли Джэ Мёнгтің басшылығымен өткізілген алғашқы операция болды.
«Үш ел Солтүстік Кореяның қауіптерін бірге тойтарып, оларға жауап беру үшін ынтымақтасады және үшжақты оқу-жаттығу жүргізуді жалғастырады», - деді министрлік.
Ортақ оқу-жаттығу үш елдің жоғары әскери басшыларының Сеулдегі кездесуіне сәйкес келді. Кездесу барысында аймақтық қауіпсіздік динамикасы қаралды және үшжақты қауіпсіздік ынтымақтастығын одан әрі дамыту жолдары талқыланды.
АҚШ-тың Бас штаб басшысы генерал Дэн Кейн Солтүстік Корея мен Қытайдың ауқымды қарулануына қарсы Оңтүстік Корея, АҚШ және Жапония арасындағы артқан қауіпсіздік ынтымақтастығының маңыздылығын атап өтті.
Кейн Оңтүстік кореялық әріптесі Адмирал Ким Мён Су мен жапон әріптесі Генерал Йошихиде Йошидамен өткен кездесуде «АҚШ-тың басты мақсаты тежеуді қайта орнату және оны жүзеге асыру үшін үш ел арасында үшжақты ынтымақтастық қажет. Корей Халық Демократиялық Республикасы мен Қытай күн тәртібін ілгерілету ниетімен әскери күштерін топтастыруға кірісті», - деді.
Бұл Сеулде өткен қорғаныс басшыларының алғашқы үш жақты жиыны болды және Кейннің бұл сапары 2023 жылы қарашада бұрынғы генерал Чарльз Браун сапарынан кейінгі АҚШ армиясының ең жоғарғы лауазымды тұлғасының Оңтүстік Кореяға алғашқы сапары ретінде тіркелді.
Сондай-ақ үш ел үшжақты көпсалалы «Freedom Edge» оқу-жаттығуын кеңейтуге келісіп, Солтүстік Кореяның ядролық және зымырандық дамуын және Ресеймен артқан әскери ынтымақтастығын айыптады.
