Азияда су тасқыны: қаза тапқандардың саны 1200-ге жақындады
Көмек ұйымдары су басқан аймақтардағы жергілікті базарларда негізгі қажетті тауарлар таусыла бастағанын және бағалардың үш есеге дейін қымбаттағанын ескертіп, қажетті заттарды өңірге жіберуге тырысып жатқанын айтты.
Индонезия мен Шри-Ланкада үкімет пен гуманитарлық ұйымдар халыққа көмек жеткізу үшін жұмылдырылды.
Қатты муссон жаңбырлары мен екі бөлек тропикалық дауыл өткен аптада бүкіл Шри-Ланкаға, Индонезиядағы Суматра аралының кей бөліктеріне, Таиландтың оңтүстігі мен Малайзияның солтүстігіне әсер етті .
Климаттың өзгеруі атмосфераның жылынып, көбірек ылғал ұстауы және теңіз суының жылынуы салдарынан дауыл мен жауын-шашынның барған сайын күшеюіне себеп болып отыр.
Су әжептәуір қайтқанымен, су тасқындарының үйлерді қиратуына байланысты жүз мыңдаған адамның қазір уақытша паналау орындарында қалып, таза су мен азық-түлікке мұқтаж екені хабарлануда.
Басқа бір дауыл Шри-Ланка бойынша қатты жаңбыр әкеліп, көшкінге түрткі болды. Бұл оқиғаларда кемінде 390 адам қаза тапты. 352 адам әлі іздестірілуде.
Шри-Ланка президенті Анура Кумара Диссанаяке жағдайды ел тарихындағы «ең күрделі табиғи апат» деп сипаттап, төтенше жағдай жариялады.