Ұлттық БАҚ-тың хабарлауынша, кеше түнде Францияның бірнеше өңірінде қатты дауыл соқты.

Дауыл елдің бірқатар аймағында электр қуатының үзілуіне себеп болды.

“Enedis” электр тарату компаниясының мәліметіне сәйкес, 53 мыңнан астам үй электр жарығынсыз қалған.

Әсіресе Овернь–Рона–Альпі және Жаңа Аквитания өңірлеріндегі тұрғындар зардап шекті.

Овернь–Рона–Альпі өңіріндегі Обена қаласында жүздеген көлікке, сондай-ақ тұрғын үйлердің шатырлары мен терезелеріне зақым келді.

Қалада шамамен 100 адам эвакуацияланып, уақытша паналау орталықтарына жеткізілді. Кемінде 5 адам жарақат алды.

Луара департаментінің Сент-Этьен қаласында болған құйын салдарынан екі жүк көлігі A72 автомагистраліне аударылып кетті.

Оқиға көлік қозғалысына кері әсерін тигізді. Сонымен қатар осы департаментте өрт сөндірушілер қолайсыз ауа райына байланысты 600-ден астам шақыртуға шыққан.

Изер департаментіндегі Сен-Кантен-Фаллавье елді мекенінде де қатты дауыл салдарынан кейбір ағаштар тамырымен құлап, электр бағандары құлады, ал үйлердің шатырларын жел ұшырып әкетті.

2 адам қаза тапты

Жаңа Аквитания өңіріндегі Сен-Виктюрньен  ауылында 30 жастағы әйелдің үстіне ағаш құлап, оқиға орнында көз жұмды.

Ал Овернь–Рона–Альпі өңіріндегі Доломье елді мекенінде найзағай түсуінен тұтанған шеберханада 37 жастағы ер адамның мәйіті табылды.