АҚШ Куба билігі мен «әскери элитасына» экономикалық қысымды күшейту шараларының соңғы кезеңі аясында Гавана үкіметімен байланысы бар сегіз ұйым, екі кісі және бес мұнай танкеріне санкция салу туралы шешім қабылдады.
АҚШ Мемлекеттік департаментінің мәлімдемесінде Кубаға қарсы жаңа санкциялар ел армиясының «заңсыз» табыс көздеріне, энергия ресурстарын жеткізу желілеріне, үкіметтегі «ықпалды топтарға» және Куба қарулы күштерін жабдықпен қамтамасыз ететін қытайлық қорғаныс компанияларына бағытталғаны айтылды.
АҚШ мемлекеттік хатшысы Марко Рубио санкцияларға қатысты: «Трамп әкімшілігі Куба билігінің ел ресурстарын әскери элитаның игілігіне жұмсауына, билік өкілдері мен олардың отбасы мүшелерінің шетелдегі жасырын қаржы желілері арқылы пайда табуына, сондай-ақ Кубаның АҚШ пен оның мүдделеріне қауіп төндіру, тыңшылық жасау және заңсыз әрекеттерді жоспарлау үшін Америкаға қарсы күштердің жаһандық коалициясына база ретінде қызмет етуді жалғастыруына жол бермейді», – деді.
Қабылданған шаралар аясында «Sociedad Mercantil Duna S.A.» атты жабдықтау компаниясы арқылы Куба Қарулы күштеріне материалдық және технологиялық қолдау көрсеткен Қытайдың екі мемлекеттік қорғаныс компаниясы санкциялар тізіміне енгізілді.
Сонымен қатар АҚШ билігі Мариэль контейнер терминалындағы логистика мен порт инфрақұрылымына жауапты бұрынғы коммерциялық директор, армияға қарасты “GAESA” коммерциялық холдингінің басшысы Ания Гильермина Ластрес Морераның қызы Ани Родригес Ластреске де санкция салу туралы шешім қабылдады.
Бұдан бөлек Кубаға мұнай тасымалдайтын бес танкердің де АҚШ санкциялар тізіміне енгізілгені хабарланды.
Вашингтонның соңғы санкциялық шешімінен кейін Куба Сыртқы істер министрі Бруно Родригес “X” әлеуметтік желісіндегі парақшасында: «Соңғы 10 айда Куба халқының АҚШ-тың экономикалық блокадасының бұрын-соңды болмаған деңгейде күшейтілуіне, теңіз блокадасымен тең энергетикалық қоршауға және қосымша санкциялардың қолданылуына ұшырауын айыптаймыз», – деп жазды.
