Израиль армиясы алдағы екі айда Газаның үштен екі бөлігін бақылауға алу үшін шабуылды күшейтуде. Бұл жоспар 2 миллионға жуық палестиналықты қоршаудағы аймақтың төрттен бір бөлігіне ығыстыруды көздейді. Бұл ақпарат бұқаралық ақпарат құралдарының әртүрлі хабарламалары мен ресми мәлімдемелерге негізделген.
Жақында өткен жоғары деңгейдегі брифингте жан-жақты талқыланған жоспарға сәйкес Израиль күштері шілде айына дейін Палестинаның Газа жағалауының шамамен 75% яғни жалпы ауданы 365 шаршы километрдің 275 шаршы шақырымын басып алуды көздеуде. Қалған Палестина халқы белгіленген үш аймаққа ығыстырылады. Олар солтүстіктегі Газа қаласы, Газаның орталығындағы босқындар лагері және оңтүстігіндегі Масауи аймағы.
Израиль шенеуніктері «Бұл операцияның мақсаты Хамастың инфрақұрылымын жою және кепілге алынғандарды құтқару» деп мәлімдеді. Бірақ адам құқықтарын қорғаушылар «Шабуыл бейбіт тұрғындарды жаңа қасіретке итермелеп, қоныс аударуды айтарлықтай арттырады» деп ескертеді.
Израиль армиясы наурыз айында атысты тоқтату келісімінен кейін басталған шабуылдар арқылы аймақ территориясының 40%-ға жуығын басып алды.
Израиль премьер-министрі Беньямин Нетаньяху «Telegram» желісінде жарияланған видеода үкіметтің қатаң ұстанымын қуаттап, Израиль күштерінің айтарлықтай жетістікке жеткенін айтты. Нетаньяху Израильдің соғысы ХАМАС жеңілгенше жалғаса беретінін айтып, «Аймақты толықтай бақылауға аламыз», - деді. Бірақ сыншылар Израиль бірнеше ай бойы бомбалау мен операцияларға қарамастан ХАМАС-ты жеңе алмағанын атап өтіп, Израильдің мақсаттарына күмәнмен қарады.
