Трамп Ресейден мұнай сатып алғаны үшін Үндістанға салынатын кедендік салықтың елеулі түрде арттырылатынын мәлімдеді.

Дүйсенбі күні “Truth Social” желісіндегі жазбасында Трамп: «Үндістан тек Ресейден ауқымды көлемде мұнай сатып алып қана қоймай, сонымен қатар сол мұнайдың көп бөлігін ашық нарықта жоғары пайдамен қайта сатады. Ресей Украинада қанша адамды қырып жатқанын олар елемейді», – деді.

Ол сөзін: «Сондықтан мен Үндістанның АҚШ-қа төлейтін кедендік салығын едәуір арттырамын», – деп жалғастырды, алайда салықтың нақты қанша пайызға өсетіні туралы ақпарат бермеді.

Бұл мәлімдеме Трамптың бұған дейін Мәскеумен жалғасып жатқан энергетикалық және қорғаныстық байланыстары үшін Жаңа Дели тарапына жасаған санкциялық ескертулерінен кейін айтылды.

Ресеймен сауда қатынастары

Өткен жылы Ресей мұнайы Үндістанның жалпы мұнай импортының шамамен 35–40 пайызын құрады.

Үндістан Трамптың бұл соңғы мәлімдемесіне қатысты әзірге ресми жауап бермеді.

Өткен аптада Трамп Үндістаннан әкелінетін тауарларға 25 пайыз көлемінде кедендік салық енгізетінін және елдің қосымша жазаға ұшырайтынын хабарлап, қосымша ақпарат бермеген болатын.