Түркия, Мысыр, Индонезия, Иордания, Пәкістан, Катар, Сауд Арабиясы және Біріккен Араб Әмірліктерінің Сыртқы істер министрлері Батыс Шериядағы палестиналықтарға қарсы шабуылдарға қатысты бірлескен жазбаша мәлімдеме жариялады.
Мәлімдемеге сәйкес, министрлер Рамалланың солтүстігіндегі Джилджилия ауылындағы Ұлы мешітке және Мезра ән-Нубани ауылындағы Әл-Фарук мешітіне жасалған соңғы шабуылдармен қатар, басып алынған Батыс Шерияда палестиналықтарға қарсы заңсыз қоныстанушылардың зорлық-зомбылығын қатаң айыптады.
Министрлер бұл шабуылдардың ғибадат орындары мен қасиетті нысандардың қол сұғылмаушылығын, сондай-ақ халықаралық гуманитарлық құқықты қоса алғанда халықаралық құқық нормалары мен Біріккен Ұлттар Ұйымының тиісті қарарларын өрескел бұзатынын атап өтті.
Сонымен қатар министрлер израильдік заңсыз қоныстанушылардың шабуылдарын және басып алынған Палестина аумақтарында тұрақсыздықты, зорлық-зомбылық пен экстремизмді күшейтетін, бейбітшілік орнатуға бағытталған халықаралық күш-жігерге нұқсан келтіретін Израильдің заңсыз шараларының жалғасуын үзілді-кесілді қабылдамайтындарын мәлімдеді.
Министрлер бұл шабуылдарда басқыншы күш ретінде Израильді жауапты деп санайтындарын атап өтті.
Сыртқы істер министрлері халықаралық қауымдастықты құқықтық әрі моральдық міндеттемелерін орындауға, Израильді басып алынған Батыс Шериядағы қауіпті шиеленісті ушықтыратын әрекеттерін тоқтатуға, заңсыз қоныстанушылардың зорлық-зомбылығын тоқтатуға, қылмыскерлерді жауапқа тартуға шақырды.
