Түркияның БҰҰ жанындағы арнайы өкілі Ахмет Йылдыз Суданда атысты тұрақты тоқтату мен инклюзивті саяси үдерісті бастауға шақырып, тұрақтылыққа қол жеткізу үшін кез келген шешім Судан билігінің өз ішінде ілгерілеуі керектігін атап өтті.
Ахмет Йылдыз бейсенбі күні БҰҰ Қауіпсіздік Кеңесінің Судан мәселесіне арналған отырысында: «Түркия Суданда жалғасып жатқан қақтығыс пен гуманитарлық жағдайға қатты алаңдаулы», - деді.
Анкараның Суданның аумақтық тұтастығын қолдайтынын қайталаған Йылдыз: «Біз Суданның бірлігі, егемендігі және аумақтық тұтастығын қолдаймыз. Мұны Судан мен бүкіл аймақтың тұрақтылығы үшін аса маңызды деп санаймыз», - деді.
Йылдыз қақтығыстың созылуындағы сыртқы факторлардың рөліне тоқталып, «Судандағы сыртқы күштердің әсеріне және оның аймаққа таралуы мүмкін қауіптеріне үлкен алаңдаушылық білдіреміз», - деді.
«Түркия қақтығысты тоқтатудың ең тиімді жолы диалог пен дипломатия деп есептейді. Егер диалог Судан тарапынан басқарылмаса, мұндай нәтижеге жету мүмкін емес»,- деді Түркия өкілі.
Халықаралық серіктестерді шешімді қолдауға шақырған Йылдыз: «Халықаралық серіктестердің күш-жігері атысты тұрақты тоқтатуға, жан-жақты саяси үдеріс пен инклюзивті бейбітшілік процесіне айналуы тиіс», - деп қосты.
Сонымен қатар Түркияның гуманитарлық көмек көрсетуді жалғастырып отырғанын айтқан Йылдыз Қауіпсіздік Кеңесін гуманитарлық жағдайға басымдық беруге және Судан басшылық ететін диалог бастамаларын жеңілдетуге шақырды.
