Африкадағы ең үлкен дәлелденген мұнай қорына ие Ливияда соңғы кездері Завия қаласындағы мұнай нысандарына жасалған шабуылдар мен электр қуатының үзілуіне байланысты жанармай құю бекеттерінде жүздеген метрге созылған көлік кезегі пайда болды.
Ливияның батысындағы Завия қаласында қарулы топтардың соңғы уақытта жиілеген қақтығыстары және мұнай нысандарына ұшқышсыз ұшу аппараттары арқылы жасалған камикадзе шабуылдары аймақтағы мұнай өңдеу зауыттарында түрлі іркілістерге әкеп соқтырды.
Ливияның Ұлттық мұнай корпорациясы оқиғалар саябырсығаннан кейін Завиядағы мұнай нысандарында өндіріс қайта басталғаны туралы мәлімдемелер жасағанымен, шамамен 10 күннен бері жанармай құю бекеттерінде ұзын-сонар кезек қалыптасуда.
Кезектердің артуына шамамен 3 айдан бері күн сайын 4-тен 10 сағатқа дейін жалғасып жатқан электр қуатының үзілуі де әсер етті. Жарықтың өшуіне байланысты генераторы жоқ жанармай құю бекеттері бұл уақытта қызмет көрсете алмаса, жұмыс істеп тұрған бекеттерде жанармай күткен көліктер саны артты.
Жанармай құю бекеттеріндегі қарбаласты өз генераторларына бидондармен бензин алу үшін кезекте тұрған ливиялықтар да ушықтыра түсті.
