Ливанның «NNA» мемлекеттік ақпарат агенттігінің хабарлауынша, Израильдің Ливанның оңтүстігіне жасаған әуе шабуылдары салдарынан кемінде 17 адам қаза тауып, көптеген адам жараланған.
Израильдің әскери ұшақтары елдің оңтүстігіндегі орман алқаптарына өрт тудыратын фосфорлы оқ-дәрілер тастап, егіс алқаптары мен бейбіт тұрғындарға тиесілі цитрус бақтарын өртеп жіберді.
Сондай-ақ Израиль Кафр-Руммане елді мекеніндегі зиратқа шабуыл жасады. Шабуылда төрт адам қаза тауып, үш адам жараланды.
Набатия мен Оңтүстік уәлаятты байланыстыратын екі жолға жасалған үш дрон шабуылы салдарынан тағы үш адам көз жұмды. Ал Набатияға қарасты Арабсалим елді мекеніндегі тұрғын үйге жасалған шабуылдан екі адам қаза тапты.
Израильдің Батыс Бекаа өңіріндегі Машгара елді мекеніне жасаған шабуылынан бес адам қаза тауып, көптеген адам жараланды.
Ал Сайда өңіріндегі Кәусәрият әс-Сайяд елді мекеніне жасалған шабуыл салдарынан екі адам көз жұмды.
Әскери операциялар артты
Ливан билігінің мәліметіне сәйкес, Израиль 2 наурыздан бері Ливанның оңтүстігінде ауқымды әскери операция жүргізіп келеді. Шабуыл салдарынан шамамен 3 мың 200 адам қаза тауып, 9 мың 600-ден астам адам жараланған.
Израиль АҚШ-тың арағайындығымен қол жеткізілген атысты тоқтату келісіміне қарамастан шабуылдарын арттыруда.
Беньямин Нетаньяху дүйсенбі күні Израиль күштеріне Ливан аумағындағы шабуылдарды кеңейту туралы тапсырма бергенін мәлімдеді.
