Қытайдың Cыртқы істер министрі Бейжіңде Португалияның Cыртқы істер министрімен кездесу өткізіп, Қытай мен Еуропа арасындағы қарым-қатынастарды нығайтуға шақырды. Бұл кездесу жаһандық сауда шиеленістері күшейген уақытта Қытай мен Еуропа көшбасшыларының ынтымақтастығын талқылау мақсатында өтті.
Қытайдың Cыртқы істер министрі Ван И Португалия Cыртқы істер министрі Паулу Ранжелмен кездесу барысында Қытай мен Еуропа арасындағы қарым-қатынастарды дамыту үшін бірге жұмыс істеуге дайын екенін мәлімдеді.
Қытай Сыртқы істер министрлігінің сейсенбі күні жасаған мәлімдемесіне қарағанда Ван «Қытай Еуропаны көпполярлы әлемдегі маңызды күш ретінде көреді және Еуропаның стратегиялық тәуелсіздігін сақтауды қолдайды», – деді.
Португалия үкіметінің Қытайға бес жылдан кейінгі алғашқы жоғары деңгейдегі бұл сапары Еуропалық Одаққа мүше елдер Вашингтонмен де, Бейжіңмен де сауда соғысы ықтималдығына алаңдаушылық білдіріп отырған уақытта жасалды.
Бейжің мен Еуропа астаналарындағы жоғары лауазымды тұлғалар АҚШ президенті Дональд Трамп әкімшілігінің трансатлантикалық байланыстар мен жаһандық саудаға қауіп төндіруіне байланысты бір-біріне ерекше назар аударуда.
Ранжелден бөлек Францияның Сыртқы істер министрі мен Италия Сенатының төрағасы да осы аптада Қытайдың жоғары лауазымды тұлғаларымен кездесу өткізеді.
ЕО-дан тыс Португалия АҚШ-ты өзінің ең үлкен экспорттық нарығы ретінде санайды және Қытайдың жаһандық инфрақұрылымдық жобасы «Бір белдеу және бір жол» бастамасын ұстанатын Батыс Еуропадағы жалғыз ел.
Өткен жылы Португалия Қытайда жасалған электр көліктеріне тарифтер енгізу туралы ЕО шешіміне дауыс беруде қалыс қалып, осы саладағы Қытай инвестицияларын құптаған болатын.
