Филиппиннің оңтүстігіндегі Басилан уәлаяты жағалауында 350-ден астам жолаушы мінген паром суға батып, 15 адам қаза тапты. «GMA News Online» агентігінің дерегінше, 43 адам әлі табылмаған.
«M/V Trisha Kerstin 3» атты паром Сулу уәлаятындағы Жоло аралына қарай бет алған.
Жағалау күзеті өкілдері жергілікті БАҚ-қа 316 адамның құтқарылғанын және құтқару операциясының жалғасып жатқанын хабарлады.
Басилан аралының губернаторы Мужив Хатаман «Facebook» желісінде Минданао аралындағы Исабела портында түсірілген видеоларды жариялады. Видеодан аман қалғандардың қайықтардан түсіріліп жатқаны, кейбірінің жылы көрпелерге оранғаны және кейбірінің зембілмен тасымалданғаны көрінеді.
Хатаман «DZBB» радиосына берген сұхбатында зардап шеккендердің басым бөлігінің жағдайы жақсы екенін, алайда егде жастағы кейбір жолаушыларға шұғыл медициналық көмек қажет болғанын айтты. Құтқару жұмыстары жүріп жатқанда ол билік орындары жолаушылар тізімін салыстырып, нақтылауды жалғастырып жатқанын жеткізді.
7 мыңнан астам аралдан тұратын архипелаг саналатын Филиппинде теңіз қауіпсіздігі нашар. Жыл сайын көптеген адам паром апаты салдарынан қаза табады.
