Теңіздегі қауіпсіздік көздерінің хабарлауынша, хоуситтер Грекияның «Eternity C» кемесін батырып жібергеннен кейін бейсенбі күні құтқарушылар Қызылтеңізден үш экипаж мүшесі мен бір қауіпсіздік қызметкерін  құтқарды.

Сондай-ақ жоғалған экипаж мүшелерінің кейбірі хоуситтердің қолында екені хабарланды.

Бейсенбі күні құтқарылғандар суда 48 сағаттан астам уақыт қалған. Әзірге 11 адам із-түзсіз жоғалып кеткен деп хабарланды.

Грекиядағы «Diaplous» теңіз фирмасының қызметкері  Никос Георгопулос «Бұл бізге із-түзсіз жоғалғандарды іздеуді жалғастыру үшін үміт береді және грек кеме операторының өтінішіне сәйкес іздеу жоспарымыздың дұрыс екенін көрсетеді», - деді.

Осы апта Йемендегі Иран қолдайтын хоуситтер тобы батырып жіберген «Eternity C»  жүк кемесі хоуситтер тарапынан батырылған гректің екінші жүк тасымалдаушы кемесі болды. Хоуситтер бұл шабуыл палестиналықтарды қолдау  мақсатында жасалғанын айтты. Бұл шабуыл аймақтағы бірнеше айға созылған тыныштықты бұзды.

Америка Құрама Штаттарының Йемендегі миссиясы хоуситтерді экипаж мүшелерін алып қашты деп айыптап, оларды дереу босатуды талап етті.

Сәрсенбі күні хоуситтердің әскери өкілі Йемен әскери-теңіз күштері кеме экипажының кейбір мүшелерін құтқару, медициналық көмек көрсету және оларды қауіпсіз жерге жеткізу үшін әрекет етіп жатқанын мәлімдеді.

Дүйсенбі күні ұшқышсыз ұшақтар мен қайықтардан атылған гранаталардың соққысынан «Eternity C» жүк кемесі сәрсенбі күні батып кетті. Теңіздегі қауіпсіздік көздерінің хабарлауынша, шабуылда төрт адам қаза тапқан.

Сейсенбі күні таңертең жасалған екінші шабуылдан кейін экипаж суға секіруге мәжбүр болды. Сәрсенбі күні таңертеңнен бері құтқару топтары жоғалған адамдарды іздеуде. Кемені басқаратын «Cosmoship Management» компаниясы «Reuters» агенттігінің сұрақтарына жауап бермеді.