Түркия президенті Режеп Тайып Ердоған Сириядан Палестинадағы Газаға, Парсы шығанағынан Ресей-Украина қақтығысына дейінгі ешбір саяси немесе қауіпсіздік мәселесі Түркияның қатысуынсыз шешілмейтінін айтты.

Сенбі күні Стамбулда өткен «Түркия Ғасыры» отырыстарының соңғы сессиясында сөйлеген сөзінде Ердоған Түркияның «аймақта да, әлемде де құрметке ие, бейбітшілік пен тұрақтылықты қамдайтын елге» айналғанын атап өтті.

Екінші дүниежүзілік соғыстан кейін құрылған жүйенің түбегейлі өзгерістер кезеңінен өтіп жатқанын айтқан Түркия президенті: «Қарулы қақтығыстар мен соғыстар әлемнің көптеген бөліктеріне, әсіресе біздің аймаққа тікелей әсер етуде. Сауда, технология және энергетика саласындағы бәсекелестік әскери және саяси билік үшін күресті жаңа әрі қиын кезеңге алып келді. Осы кезеңде тұрақсыздық толқындары кеңейіп жатқанда, біз ішкі және сыртқы шекараларымызда қабылданған шаралар арқылы Түркияны осы қауіптерден қорғап қалдық», – деді ол.

Ұлттың бірлігі мен қауіпсіздігін қамтамасыз ету

Ердоған Түркияның күш-қуатының барлық деңгейде мойындалғанын атап өтті.

Ол Анкараның көзқарасы «ешбір ұрпақ босқа кетпейтін, аналар жыламайтын, бейбітшілік, қауіпсіздік пен өркендеу бүкіл географиямызда үстемдік ететін» болашақты қамтамасыз етуге бағытталғанын айтты.

Ердоғанның айтуынша, мерзімді мақсат – ұлттың бірлігі мен қауіпсіздігін қамтамасыз етіп, бейбіт аймақ құруға үлес қосу.

«Ортақ ерік-жігермен біз алдымен терроризмнен азат Түркияны, содан кейін терроризмнен азат аймақты ұлттың болашақ ұрпақтарына мұра ретінде қалдырамыз», – деді ол.