Армения премьер-министрі Никол Пашинян ел аумағында орналасқан Ресей әскери базасының ел қауіпсіздігі үшін маңызды емес екенін және оған мұқтаж емес екенін мәлімдеді.
Никол Пашинян баспасөз мәслихатында Арменияның Гюмри қаласында орналасқан Ресейдің 102-әскери базасына қатысты пікір білдірді.
Пашинян әскери база мәселесін алғаш болып Ресей тарапы көтергенін айтып, «Әскери база Арменияның қауіпсіздігі үшін аса маңызды емес», – деді.
Ол Ресей әскери базасының Армения қауіпсіздігіне айтарлықтай үлес қоспайтынын атап өтіп, «Ресей –дос мемлекет. Бізге Ресейдің әскери базасы қажет емес. Егер оны алып кеткісі келсе, ертең-ақ алып кетсін. Ал қалдырғысы келсе, Армения үшін қажеті жоқ бұл базаның қандай шарттармен қалатынын талқылауға дайынбыз», – деді.
Арменияның Гюмри қаласында орналасқан Ресейдің 102-әскери базасы Ресейдің Оңтүстік Кавказдағы негізгі әскери нысандарының бірі саналады.
База 1995 жылы жасалған келісім негізінде жұмыс істейді. Онда құрлық әскерлерімен қатар әуе қорғанысы жүйелері мен әскери ұшақтар да орналасқан.
Ресей президенті Владимир Путин бірнеше апта бұрын базаға қатысты: «Егер Армения бұл инфрақұрылымның қажеті жоқ деп шешсе, ертең-ақ кетеміз», – деген болатын.
