Түркия мен Нигерия өнеркәсіп, сауда, инвестиция және қорғаныс салаларындағы ынтымақтастықты тереңдету мақсатында екі ел арасындағы экономикалық байланыстарды айтарлықтай кеңейтуді көздейтін жаңа механизмдердің күшіне енетінін жариялады.
Түркияның Сауда министрі Өмер Болат Нигерия президенті Бола Ахмед Тинубуның Түркияға жасаған ресми сапары барысындағы келіссөздерден кейін Анкара мен Абуджаның Бірлескен экономикалық және сауда комитетін (JETCO) құру туралы бірлескен мәлімдемеге және Халал сапа инфрақұрылымы туралы өзара түсіністік меморандумына қол қойғанын айтты.
Болат өз мәлімдемесінде «Кездесуде өнеркәсіп, сауда, инвестиция және өндіріс салаларындағы ынтымақтастығымызды тереңдететін тақырыптарды жан-жақты талқыладық», — дей келе, бұл келісімдердің екі елдегі кәсіпорындар үшін жаңа мүмкіндіктер ашатынын атап өтті.
Тоғыз келісімге қол қойылды
Болат екі тараптың да 5 миллиард долларлық екіжақты сауда мақсатына жету үшін жұмыс істеп жатқанын, сауданы әртараптандыруға, инвестицияларды арттыруға және жеке сектор серіктестігін нығайтуға уәде бергенін айтты. Сонымен қатар Түркияның Нигериямен қарым-қатынасын «сенім мен ұзақ мерзімді стратегиялық серіктестік тәсіліне негіздеп» жалғастыратынын білдірді.
Анкарада өткен екіжақты және делегация деңгейіндегі кездесулерден кейін президенттер Режеп Тайып Ердоған мен Бола Ахмед Тинубуның қатысуымен тоғыз келісімге қол қойылды. Келісімдер әскери дайындық, қорғаныс және қауіпсіздік, диаспора саясаты, медиа және коммуникация, жоғары білім, халал аккредитациясы, дипломатиялық дайындық, сондай-ақ әлеуметтік және әйел істері салаларын қамтиды.
Тинубу тұрақсыздықпен күрес және экономикалық өсуді ынталандырудағы бірлескен күш-жігерді атап өтіп, Нигерияның әсіресе қауіпсіздік пен сауда салаларында Түркиямен ынтымақтастықты тереңдетуді мақсат ететінін айтты.
Артып келе жатқан байланыстар
Екі ел арасындағы сауда айналымы 2025 жылдың алғашқы 11 айында 688,4 миллион долларға жетті. Нигерия өткен жылы энергия саудасын қосқанда Сахарадан оңтүстікке қарай орналасқан Африка елдері ішінде Түркияның ең ірі сауда серіктесі болды.
Тараптар арасындағы қорғаныс байланыстары да қарқынды дамып келеді. Нигерия Әскери-әуе күштері түрік өндірісінің ұшқышсыз ұшу аппараттары мен алты дана ATAK T129 шабуыл тікұшағын сатып алды. Түрік компаниялары Нигерияның құрылыс, энергетика, тоқыма және өндіріс секторларында белсенді қызмет атқаруда, 50-ден астам түрік фирмасы елге шамамен 400 миллион доллар инвестиция салды.
Түрік мердігерлерінің Нигерияда қолға алған жобаларының құны 3 миллиард долларға жуықтайды. 1960 жылы дипломатиялық қарым-қатынас орнатқан Түркия мен Нигерия әсіресе Абуджа содыр топтарға қарсы күресін күшейткен тұста қауіпсіздік және қорғаныс өнеркәсібіндегі ынтымақтастықты жүйелі түрде кеңейтіп келеді.
