Ресей бейсенбі күні “Антонов Ан-24” үлгісіндегі жолаушы ұшағы елдің Қиыр Шығысында орналасқан Амур өңірінде ұшу кезінде радардан жоғалғанын хабарлады.

Амур облысының губернаторы Василий Орлов “Telegram” арнасында төтенше жағдайлар қызметіне сілтеме жасап, ұшақ өңірдің әкімшілік орталығы Благовещенск қаласынан Тында кентіне қарай бағыт алған кезде радардан жоғалғанын айтты.

Орлов: «Алдын ала мәлімет бойынша, ұшақ бортында бес баланы қоса алғанда 43 жолаушы және алты экипаж мүшесі болған», - деп хабарлап, жоғалған ұшақты іздеу жұмыстарының жалғасып жатқанын жеткізді.

Төтенше жағдайлар министрлігі де іздеу жұмыстарын растады. Олардың хабарлауынша, ұшақ радардан жоғалып, Тындадағы жергілікті әуежайдан бірнеше шақырым жерде байланысқа шықпаған.

Министрлік мәлімдемесінде: «Ұшақ «Хабаровск — Благовещенск — Тында” бағытымен ұшып бара жатқан. Алғашқы мәліметтерге қарағанда, бортта шамамен 40 адам болған», - деп, оқиғаға қатысты нақты деректер анықталып жатқанын атап өтті.