Тель-Авив университеті жүргізген зерттеу 2023 жылдан кейінгі жағдайға, атап айтқанда Газадағы соғыс, сот реформалары және қоғамдық наразылықтардың әсеріне назар аудара отырып, соңғы 15 жылдағы көші-қонды талдады.

Зерттеу нәтижесіне сәйкес, 2023 және 2024 жылдары шамамен 950 дәрігер Израильден кеткен. Алайда елге қайта оралғандарды ескерсек, бұл көрсеткіш 510 адамды құрайды.

Елден кеткен дәрігерлердің үштен екісі Израильдің медицина факультеттерінің түлектері екені анықталған. Бұл көрсеткіш алдыңғы жылмен салыстырғанда жоғары екені атап өтілді.

Зерттеу Израильдің Орталық статистика бюросы, Жоғары білім кеңесі, Денсаулық сақтау министрлігі және Салық басқармасы ұсынған деректерге сүйене отырып, көші-қон, білім беру, лицензиялау және табыс салаларындағы өзгерістерді жан-жақты талдаған.

Елге қайта оралғандардың азаюы

Зерттеу дерегінше, 2023-2024 жылдары шамамен 100 мың израильдік елден кеткен. Бұл жыл сайын орта есеппен 50 мың адамға сәйкес келеді және ұзақ уақыт сақталған салыстырмалы тұрақтылықтан кейін жаңа үрдістің қалыптасқанын аңғартады.

Зерттеушілер «Елден кеткендер арасында дәрігерлер, ғалымдар, инженерлер және табысы жоғары азаматтар санының айтарлықтай өскенін анықтадық», – деп мәлімдеді. Сонымен қатар елге оралғандардың баяулауы адам  капиталының шетелге ағылуын күшейтіп отырғанына назар аударды.

Зерттеу елден кеткен дәрігерлердің басым бөлігі тәжірибелі мамандар екенін көрсетті. Сондай-ақ бұл үрдіс жалғаса берсе, оның ауыр экономикалық салдарға әкелуі мүмкін екені ескертілді.

Зерттеушілер бұл жағдай елге өте үлкен қауіп төндіруі мүмкін екенін атап өтіп, «Саяси, экономикалық немесе қауіпсіздікке қатысты соққылар көші-қонның артуына алып келуі мүмкін», – деді.