АҚШ Иранның оңтүстігінде зымыран қондырғалары мен мина қоюға пайдаланылды делінген қайықтарға шабуыл жасағанын мәлімдеді.

АҚШ Орталық қолбасшылығының өкілі, капитан Тим Хокинс «Fox News» арнасына берген сұхбатында: «АҚШ бүгін Иран күштерінен төнген қауіпке  жауап ретінде және әскери қызметкерлерін қорғау мақсатында Иранның оңтүстігіне соққы берді», – деді.

Хокинстің айтуынша, нысаналар қатарында зымыран ұшыру алаңдары мен теңізге мина орналастыруға әрекеттенген Иран қайықтары болған.

«АҚШ Орталық қолбасшылығы атысты тоқтату режимі кезінде сабырлылық танытып, өз күштерін қорғауды жалғастыруда», – деді өкіл.

Хокинс шабуылдарға қатысты қосымша мәлімет бермеді.

Ал Иран бұқаралық ақпарат құралдары дүйсенбі күні таңертең елдің оңтүстігіндегі Бендер-Аббас қаласында, сондай-ақ Парсы шығанағы жағалауындағы Сирик пен Джаск маңында жарылыстар болғанын хабарлады.

Иранның «Fars» ақпарат агенттігі Бендер-Аббас тұрғындарының бірнеше жарылыс дауысын естігенін жеткізді. Алайда жарылыстардың нақты орны мен себебі алғашында анықталмады. Агенттік сондай-ақ Иранның Сирик пен Джаск аудандарында да дәл осындай дауыстың қатар естілгенін хабарлады.

Ал «Mehr» агенттігі операциялардан кейін Бендер-Аббас қаласындағы жағдайдың бақылауда екенін хабарлады.