Түркия Республикасының президенті Режеп Тайып Ердоған Газадағы оқиғалардың ұмытылмауы және әділеттің орнауы үшін барлық майданда күресті табандылықпен жалғастыратынын атап өтті.
Ердоған бейсенбі күні Анкарада өткен марапаттау рәсімінде: «Түркия Газада болған жайттардың ұмытылмауы және әділдіктің орнауы үшін барлық бағытта табандылықпен күресті жалғастыра береді. Ақиқатты айтуды ұран еткен ел ретінде біз Палестина халқымен біргеміз», - деді.
«Батыл» медиа
Ердоған сондай-ақ Газада болып жатқан оқиғаларды жеткізуде «батыл» ұстаным танытқаны үшін Түркияның бұқаралық ақпарат құралдарын жоғары бағалап, «Газадағы геноцид мәселесінде, әсіресе TRT мен Aнадолы агенттігіміз бастаған түрік баспасөзі шын мәнінде батыл ұстаным танытты», - деді.
Ердоған Анадолы агенттігінің палестиналық фототілшісі Али Джедаллахты мақтап, «Оның кадрлары Газадағы қырғынның сұмдық деңгейге жеткенін ғана емес, Палестина халқының әділ, әрі абыройлы қарсылығын күн тәртібіне шығарды», - деді.
«Газада екі жыл бойы жалғасқан қатыгез геноцидті фотолар арқылы бүкіл әлемге әшкерелеп, «өркениетті» әлемнің бетіне басқан Али бауырымыз бүгінде Aнадолы агенттігінің фототілшісі ретінде оқиға орнында қызмет атқарып жүр», - деп қосты президент.
