Израиль армиясы атысты тоқтату туралы келісімге қарамастан, Ливанның оңтүстігіндегі елді мекендерге әуе соққыларын жалғастыра отырып, мектеп ғимаратын жарып жіберді.
Ливанның ресми “NNA” агенттігінің хабарлауынша, Израиль жойғыш ұшақтары Ливанның оңтүстігіндегі Ханин және Кантара елді мекендеріне әуе соққыларын ұйымдастырды.
Израиль әскери ұшақтары сонымен қатар Шығыс Завтар мен Жоғарғы Небатия елді мекендері арасындағы Айн әс-Самахия аймағын да нысанаға алды.
Сур қаласына қарасты Мансури елді мекеніндегі кейбір үйлер де әуе шабуылдарына ұшырады.
Ханин елді мекеніндегі тағы бір әуе шабуылында Біріккен Ұлттар Ұйымының Ливандағы Уақытша Бейбітшілік Күштері (UNIFIL) бекетінің айналасы нысанаға алынды.
Екінші жағынан, Израиль армиясы Кэфртебнит елді мекеніндегі Шехид Махмуд Факих атындағы Мемлекеттік мектеп ғимаратын жарылғыш заттармен қиратты.
Израильдің Ливандағы шабуылдары
Израиль армиясы Ливанға 2 наурызда жойқын әуе соққыларын бастап, елдің оңтүстігіндегі ондаған елді мекенді басып алған еді.
Ливан үкіметі бұл кезеңде елде босып кеткендердің саны 1 миллионнан асқанын мәлімдеген болатын.
Ливан мен Израиль арасында 17 сәуірде күшіне енген атысты тоқтату келісімі кейіннен бірнеше рет ұзартылды.
Ливан Денсаулық сақтау министрлігі соңғы мәлімдемесінде Израильдің 2 наурыздан бері елге жасаған шабуылдарында кем дегенде 4 мың 383 адамның қаза тапқанын хабарлады.
Сонымен бірге Вашингтонда Израиль мен Ливан арасында жүргізілген тікелей келіссөздердің 5-ші раундынан кейін 26 маусымда Ливан мен Израиль арасында негіздемелік келісімге қол қойылған еді.
