АҚШ президенті Дональд Трамп бірнеше аптаға созылған өңірлік қақтығыстар мен АҚШ қолдаған Иран-Израиль арасындағы атысты тоқтату келісімінен кейін, АҚШ-тың Иранмен келіссөздер жүргізуді жоспарлап отырғанын мәлімдеді.
Трамп дүйсенбі күні Израиль премьер-министрі Беньямин Нетаньяхумен Ақ Үйде өткізген ортақ баспасөз мәслихатында «Иранмен келіссөз жүргізуді жоспарладық. Олар да сөйлескісі келеді», - деді.
«Кездесуге өтініш білдірді... егер біз бір нәрсені қағазға түсіре алсақ, бұл жақсы болар еді. Жақсы болады. Не боларын көре жатармыз», – деп қосты ол.
Трамптың Таяу Шығыс жөніндегі арнайы өкілі Стив Уиткофф кездесу алдағы бір апта ішінде өтетінін растады.
«Иранға қарсы тағы бір әскери шабуыл АҚШ-тың күн тәртібінде ме?» деген сұраққа Трамп: «Оған мәжбүр болмаймыз деп үміттенемін. Ондай қадамға барамыз деп ойламаймын. Олар да мұны қаламайды деп ойлаймын. Келіссөз жүргізгісі келеді... мәселені шешкісі келеді», - деп жауап берді.
Бұл мәлімдеме АҚШ-қа тиесілі «B-2» бомбалаушы ұшақтарының Иранның Фордо және Натенз ядролық нысандарына 14 дана «GBU-57» жер астын тесіп өтетін бомба тастағаннан кейін және Исфахандағы нысанға «Tomahawk» зымырандарымен шабуыл жасағаннан кейін екі апта өткен соң жасалды.
Бұл шабуылдар Иранның ядролық бағдарламасына қарсы бағытталған АҚШ-тың ауқымды науқанының бір бөлігі болды.
АҚШ пен Иран арасындағы келіссөздердің алтыншы кезеңі бастапқыда 15 маусымға жоспарланған болатын, алайда 13 маусымда Израильдің Иранның әскери, ядролық және азаматтық нысандарына әуе шабуылын жасауы келіссөздердің тоқтауына себеп болды.
12 күнге созылған қақтығыстан кейін 24 маусымда атысты тоқтату келісіміне қол жеткізілді.
Трамп дүйсенбі күні Иранның қазіргі кезде «басқаша» екенін және дипломатия жөнінде оптимистік көзқараста екенін айтты.
«Бұл істі аяқтаймыз деп үміттенемін. Иә, менің ойымша Иран келіссөз жүргізгісі келеді. Олар бейбітшілік орнатқысы келеді деп ойлаймын және мен мұны қолдаймын», - деді ол.
Трамп АҚШ-тың Иранға қарсы енгізген санкцияларын «уақыты келгенде» алып тастайтынын айтып, «Уақыты келгенде бұл санкцияларды алып тастап, қалпына келтіруге мүмкіндік бергім келеді. Мен Иранның бейбіт жолмен қалпына келуін және «Америкаға өлім, Израильге өлім» сияқты сөздерді тоқтатқанын қалаймын»,- деді.
