Ливан Денсаулық сақтау министрлігінің мәліметіне қарағанда дүйсенбі күні таңертең Израильдің Бейруттың оңтүстіктегі шет аймақтарына және Ливанның оңтүстігіне жасаған соққылары салдарынан кемінде 31 адам қаза тауып, 149 адам жараланды.
Министрлік бұл көрсеткіш алғашқы есепке негізделгенін және соңғы көрсеткіш емес екенін хабарлады.
Израиль БАҚ-тарына қарағанда, Израиль әскері Ливан аумағында бірқатар әуе шабуылын жасап, бұл әрекеттерді «Израильдің солтүстігіне бағытталған зымыран шабуылына жауап» деп түсіндірген.
Хезболла жексенбі күні Израиль мен АҚШ-тың шабуылдарынан кейін Иранды қолдау «міндет» екенін мәлімдеді.
Соңғы шабуылдар сенбі күні АҚШ пен Израильдің Иранға соққы жасауынан кейін Таяу Шығысқа тараған қақтығыстың одан әрі кеңеюіне әкелді. Хезболла ˗ Тегеранның аймақтағы негізгі одақтастарының бірі.
Сенбі күні соғыс басталғалы бері 260-тан астам адам қаза тапты, олардың басым бөлігі Иранда (200-ден астам). Қақтығыс кеңейген сайын қарымта шабуылдар мен АҚШ-қа қарсы наразылық салдарынан Израильде кемінде 10 адам, Ливанда 31 адам, АҚШ-та 3 адам, Парсы шығанағы елдерінде бірнеше адам қаза тапқан.
2023 жылдың қазанында ХАМАС-тың Израильге жасаған шабуылынан кейін басталған соғысқа Хезболла да Израильмен қақтығыстарға қатысып, әлсіреген болатын.
2024 жылдың қарашасында Израиль мен Хезболла арасында бітім жасалғанымен, Израиль Ливандағы нысандарға соққы жасауды жалғастырды.
Маусым айында Израиль мен Иран арасындағы 12 күндік соғысқа Хезболла тікелей араласпаған болатын.
