Түркия мен Еуропалық одақ «Түрік теміржол секторында интермодальды тасымалдау қызметтерін күшейту» жобасының аяқталуына байланысты теміржол жүк тасымалы мен көлік байланысы саласындағы ынтымақтастықты атап өтті.
Түркияның Көлік және инфрақұрылым министрі Абдулкадир Уралоглу «Nsosyal» платформасындағы жазбасында «U-IMT» жобасының отырысы ЕО-ның даму мәселелері жөніндегі комиссары Марта Костың қатысуымен өткенін хабарлады.
Министр Уралоглу: «Орта дәліздің тасымал қуатын арттырып, Түркияның жаһандық саудадағы стратегиялық орнын одан әрі нығайтатын ортақ мақсаттар жолындағы жұмысымызды жалғастырудамыз», – деді.
ЕО мен Түркия бірлесіп қаржыландырған жоба Түркия теміржол секторында интермодальды жүк тасымалы қызметтерін дамытуға, сондай-ақ қауіпсіз, экологиялық таза әрі теңгерімді көлік жүйесіне көшуді қолдауға бағытталған.
Жоба аясында интермодальды жүк тасымалы бойынша іс-қимыл жоспарын әзірлеу, стратегиялық инфрақұрылым қажеттіліктерін анықтау және Түркияның көлік органдарының институционалдық әлеуетін күшейту көзделеді.
Орта дәліз яғни Транскаспий халықаралық көлік бағыты ̶ Түркия, Кавказ және Орталық Азия арқылы Азия мен Еуропаны байланыстыратын балама сауда жолы ретінде маңызға ие.
Министр Уралоглу бағдарламаға қатысып, Түркия–ЕО ынтымақтастығына үлес қосқаны үшін Косқа алғыс айтты.
