Ұлыбритания премьер-министрі Энди Бернхэм Израильдің Батыс Шерия мен Газадағы әрекеттеріне үнсіз қалмайтындарын мәлімдеп, «Балалармен қатар көптеген адам қаза тапты. Аймаққа өте аз гуманитарлық көмек кіріп жатыр», – деді.
Энди Бернхэм АҚШ-тың Нью-Йорк қаласында өтіп жатқан Біріккен Ұлттар Ұйымы Бас Ассамблеясында сөйлеген сөзінде Ұлыбританияның Таяу Шығысқа қатысты ұстанымын қайта қарағанын айтып, бірқатар елмен бірге нақты қадам басып жатқандарын мәлімдеді.
Бернхэм Израильдің 2023 жылғы 7 қазанда бастан өткерген оқиғалары оның Газа мен Батыс Шериядағы әрекеттерін ақтай алмайтынын атап өтті.
«Балалармен қатар көптеген адам қаза тапты. Аймаққа өте аз көмек кіріп жатыр. Бұл жағдай тым ұзаққа созылды. Адамдардың азабы күшейіп, екі халық үшін де ең тиімді жол саналатын екі мемлекет қағидатына негізделген шешімге қауіп төніп тұрған кезде біз үнсіз қала алмаймыз», – деді ол.
Бернхэм Израильдің Батыс Шерияда салуды жоспарлап отырған заңсыз қоныстарына да қарсылық білдірді.
«Бұған жол беруге болмайды. Сондықтан біз нақты шара қабылдап, заңсыз қоныстармен сауда жасауға тыйым салдық. Израильдің Палестина аумағын басып алуы заңсыз екенін мәлімдедік. Қайғы-қасірет пен адам өлімі тоқтағанын қалаймыз. Израильдіктер мен палестиналықтардың бейбітшілік пен қауіпсіздік жағдайында өмір сүргенін қалаймыз», – деді Бернхэм.
Ол екі мемлекет қағидатына негізделген шешім туралы көп айтылып, бірақ оны жүзеге асыруда нәтиже болмауы саяси институттарға деген сенімді әлсіреткенін атап өтті.
«Қарсыластарымыз бұл жағдайды өз мүддесіне пайдалануға тырысуы мүмкін», – деді Энди Бернхэм.
