Режеп Тайып Ердоған «EFES-2026» оқу-жаттығуында сөйлеген сөзінде  Измирде өтіп жатқан бұл шараға қатысқанына қуанышты екенін айтып,  бұл іс-шараны «тек Түркияның ғана емес, әлемдегі санаулы әрі ауқымды әскери жаттығулардың бірі» деп атады.

Оқу-жаттығу кезінде қолданылған отандық қорғаныс өнеркәсібі өнімдеріне назар аударған президент былай деді:

«Отандық қорғаныс өнеркәсібі жоғары технологиямен жасаған өнімдеріміз қолданылған «EFES» жаттығуы — жоспары, ұйымдастырылуы, әскери бөлімдердің үйлесімді әрекеті, мазмұны мен стратегиялық үндеуі арқылы жай ғана әскери жаттығудан гөрі әлдеқайда терең мағынаға ие. (...) Мұнда тежеу күшінен бөлек, бейбітшілік үшін қаншалықты дайындық, мықты ерік пен табандылық қажет екенін көре аламыз», - деді.

Президент әлемде жаңа тепе-теңдік пен одақтардың қалыптасып жатқанын, алайда жаһандық деңгейде жаңа тәртіп әлі орнамағанын айтты. Сондай-ақ ол: «Әлем бұрын санаулы ірі державалар айқындаған тәртіптен көпполярлы және көптеген ойыншы қатысатын жаңа құрылымға қарай қарқынды түрде бет бұрып келеді», - деді.

«Шиеленісті аймақта бейбітшілік пен қауіпсіздігімізді сақтау үшін армиямызды қуатты әрі заманауи деңгейде ұстауымыз қажет екенін жақсы білеміз», - деген президент Ердоған Түркияның өңірдегі рөліне тоқталды.  «Түркия соғыс пен хаосты қаржыландыратындарға қарсы бейбітшілік пен тұрақтылықты қорғауды жалғастырады. Газада, Ливанда және өңіріміздің өзге аймақтарында бала, әйел, қарт демей бәрін қырып жатқан геноцид желілерге қарсы бүкіл адамзаттың ортақ құндылықтарын табандылықпен қорғауды жалғастырамыз», - деді.