Түркия президенті Сирияда бірлік пен бейбітшілікке шақырды
Түркия президенті Ердоған Сирияның табиғи және экономикалық ресурстары қалалардың астына туннель қазуға емес, халықтың әл-ауқатына қызмет етуі тиіс екенін атап өтті.
Түркия президенті Режеп Тайып Ердоған Сирияда тұрақтылық пен келісімге шақырып, барлық тарапты бірлікті басты мақсат етуге және бейбітшілік үмітін әлсірететін қадамдардан аулақ болуға үндеді. Ердоған Анкарада өткен Әділет және даму партиясының Түркия Ұлы Ұлттық Мәжілісіндегі топтық жиналысында «Сирия үшін ең үлкен тілегіміз тұрақтылық пен бейбітшіліктің орнауы, сириялықтардың өз болашағын бірлік ішінде бірге құруын қалаймыз», - деді.
Көп жылға созылған қақтығыстан кейін елдің әртүрлі топтары арасындағы ынтымақтастықтың маңыздылығына назар аударған Ердоған ұзақ мерзімді шешімнің негізі айқындалғанын айтып, тараптарды өткен қателіктерді қайталамауға шақырды.
«Тұрақты бейбітшіліктің жол картасы белгіленді. Тараптар қате есептерден, бұрынғы қателіктерді қайталаудан және үдерісті шектен тыс талаптармен уландырудан аулақ болуы тиіс», - деді ол.
Соғыстың гуманитарлық қырына да тоқталған Ердоған: «Араб, түрікмен, күрд немесе нусайри болсын, төгілген әрбір тамшы қан жүрегімізді ауыртады. Сирияда жоғалған әрбір жан өзіміздің бір бөлшегімізді жоғалтумен тең», - деді.
Ердоған сондай-ақ қайта құру мен экономикалық қалпына келу кезеңіне көшу қажеттігін айтты.
«Сирияның жер үсті және жер асты ресурстарын қалалардың астына туннель қазу үшін емес, қоғамның барлық топтарының әл-ауқаты үшін пайдалану қажет уақыт келді», - деді ол.
Аймақтық алаңдаушылықтарға да тоқталған Ердоған Түркия үстемдікке ұмтылып отыр деген айыптауларды жоққа шығарып, «Түркия аймақта ықпал іздеп отырған жоқ және басқа елдерді қалыптастыру сияқты ниеті де жоқ. Керісінше, біз шынайы бауырластыққа ұмтыламыз», - деді.