Ресей Сыртқы істер министрлігінің хабарлауынша, Ресей Сыртқы істер министрі Сергей Лавров пен АҚШ Мемлекеттік хатшысы Марко Рубио Украинадағы қақтығысты шешу мүмкіндіктерін және дүйсенбі күні Түркияда өтеді деп жоспарланған Ресей-Украина келіссөздерін талқылады.
Министрлік жексенбі күні ресми сайтында жариялаған мәлімдемесінде «Украина дағдарысына қатысты жағдай талқыланды» деп көрсетті.
«С.В. Лавров пен М. Рубио Украина дағдарысын шешуге қатысты түрлі бастамалар жөнінде пікір алмасты, оның ішінде 2 маусымда Стамбулда тікелей Ресей-Украина келіссөздерін қайта жалғастыру жоспары да бар» делінген хабарламада.
АҚШ Мемлекеттік департаменті бұл кездесудің Ресейдің сұранысы бойынша өткенін атап өтіп, Рубионың АҚШ президенті Дональд Трамптың Ресей мен Украина арасындағы тікелей келіссөздердің жалғасуы қажет деген үндеуін тағы да қайталағанын және бұл «тұрақты бейбітшілік» үшін маңызды екенін жеткізгенін мәлімдеді.
Осы арада ресейлік ақпарат агенттіктері Кремль кеңесшісі Владимир Мединскийдің Ресей Украинадан бейбіт келісім жобасын алғанын хабарлағанын жеткізді.
“TASS” агенттігінің мәліметінше, Мединский: «Ресей делегациясы Украинадан бейбіт шешімге қатысты меморандум жобасын бұрын алған», - деді. Мединский дүйсенбі күні Украинамен өтетін бейбіт келіссөздерде Мәскеу делегациясын басқарады.
Көпір оқиғасы
Ресей Сыртқы істер министрлігі сондай-ақ кездесу барысында Рубионың Украина шекарасындағы Ресейдің екі облысындағы көпірлердің жарылуы салдарынан қаза тапқандарға көңіл айтқанын мәлімдеді.
«Ресей тарапы уәкілетті органдардың жан-жақты тергеу жүргізіп, нәтижелерін жариялайтынын, кінәлілер анықталып, сөзсіз тиісті жазасын алатынын атап өтті», - делінген хабарламада.
Ресей билігінің мәліметінше, сенбі күні екі көпірдің жарылуы салдарынан кемінде жеті адам қаза тауып, 69 адам жарақат алған.
Украина шабуылы
Екі шенеунік арасындағы келіссөз Украина Ресейдің әскери әуе базаларына бұрын-соңды болмаған шабуыл жасағаннан кейін өтті.
Украинаның үкіметтегі дереккөзі “Reuters” агенттігіне берген мәліметінде Украина Ресейдің әуе базаларына ұйымдастырылған дрон шабуылдары туралы Америка Құрама Штаттарын алдын ала хабардар етпегенін айтты.
Украинаның ішкі барлау қызметі төрт базаға жасалған шабуылдарға жауапты екенін мәлімдеді, ал қауіпсіздік қызметінің бір өкілі орыстың жалпы саны 41 әскери ұшағының зақымдалғанын хабарлады.
Ресей Қорғаныс министрлігі екі аймақтағы базаларда ұшақтардың отқа оранғанын, бірақ өрттің сөндірілгенін мәлімдеді.
