Дүйсенбі күні Мексика билігі қатты нөсер салдарынан болған су тасқынында қаза тапқандар саны 64-ке жеткенін, 65 адамның із-түзсіз жоғалғанын хабарлады.

Мексиканың Ұлттық азаматтық қорғау қызметінің мәліметінше, өткен аптадан бері «Присцилла» мен «Раймонд» тропикалық дауылдары салдарынан толассыз жауған жауын-шашын адам шығынының артуына себеп болды.

Ұлттық азаматтық қорғау ұйымының дерегіне сәйкес, ең көп зардап шеккен аймақтар қатарында Веракрус, Пуэбла, Идальго, Керетаро және Сан-Луис-Потоси штаттары бар. Бұл өңірлерде 64 адам қаза тауып, 65 адам іздестіріліп жатыр.

Президент Клаудия Шейнбаум Ұлттық сарайдағы күнделікті баспасөз мәслихатында жағдайды талқылап, апат аймақтарындағы азаматтарға көмек көрсету үшін төтенше жағдай тобының толық жұмылдырылғанын айтты.

Шейнбаум киім, гигиеналық құрал, ауыз су және азық-түлікті жеткізу үшін зардап шеккен штаттарға қосымша топ жіберілгенін мәлімдеді. Ол сондай-ақ: «Қайғылы оқиғадан зардап шеккендерге қолдау көрсетіп, қалпына келтіру жұмыстарына бар ықыласымызбен үлес қосамыз»,- деді.

Мексика медиасының хабарлауынша, соңғы жылдардағы ең ауыр су тасқындарының бірі болған бұл апаттан 250 мыңнан астам адам зардап шеккен. 50 мыңнан астам үй зақымданған.