Түркия Қорғаныс өнеркәсібі басқармасының үйлестіруімен әзірленген және әуе қорғанысына қатысты барлық құрамдас бөлікті қамтитын «Болат күмбез» жобасы Түркияның көпқабатты әуе қорғанысы архитектурасын қалыптастыратын отандық «жүйелердің жүйесі» ретінде ерекшеленеді. «Болат күмбез» кез келген қауіп-қатерге қарсы тұра алады.

Барлық деңгейлері толықтырылып, қарулы күштер қатарына енгізілген «Болат күмбездің» ең төменгі қабатында дрондар тобы мен камикадзе дрондарына қарсы «Dronedef» жүйелері, «KORKUT» және «GÜRZ» тәрізді кешендер, сондай-ақ түрлі биіктікке арналған радарлар орналасқан. Жүйенің ортаңғы қабатында «HİSAR», ал жоғарғы қабатында «SİPER» әуе қорғанысы жүйелері бар.

Қару жүйелерін, радарларды, электро-оптикалық шешімдерді, байланыс модульдерін, басқару-бақылау орталықтарын және жасанды интеллект технологияларын біріктіретін «Болат күмбез»  ̶  Түркия әуе қорғанысының негізгі орталығы.

«Болат күмбез» құрамындағы барлық жүйенің үйлесімді жұмысын қамтамасыз ететін «HAKİM» басқару шешімі, бақылау-анықтау жүйелері мен байланыс технологиялары да «ASELSAN» тарапынан әзірленуде.

Әуе қорғанысы қабілеті «ASELSAN»-ның жарты ғасырдан астам уақыт бойы жинақтаған технологиялық тәжірибесі негізінде қалыптасқан стратегиялық маңызы зор мүмкіндік ретінде бағаланады. Күн сайын жаңа мүмкіндіктермен толықтырылып отырған «Болат күмбез» жаңа құрамдас бөліктер арқылы қуатын одан әрі арттыруда.