Осы аяда Ресей президенті Путин жексенбі күні мәлімдеме жасап, Ресейдің АҚШ-қа көрсетіп отырған құрметі секілді АҚШ-тың да Ресейдің ұлттық мүдделеріне құрметпен қарауын күтетінін айтты.

Путин бұл пікірін ресейлік журналист Павел Зарубинмен жүргізген сұхбатында білдірді. Сұхбаттың бір бөлігі “Telegram” платформасында жарияланған. Ол былай деді:
«Америкалықтар, АҚШ халқы және елдің басшылығы, соның ішінде президент те өз ұлттық мүдделерін көздейді. Біз бұған құрметпен қараймыз. Бізге де сондай кұрмет танытылуы керек деп есептейміз.»

Бұл мәлімдеме АҚШ президенті Трамптың дүйсенбі күні Ресей мен Украина басшыларымен бітім туралы келіссөздер өткізуге ниетті екенін жариялауынан кейін жасалды.

Трамптың бұл бастамасы Түркияның арағайындық етуімен Стамбулда өткен Ресей мен Украина арасындағы жоғары деңгейдегі бейбіт келіссөздерден соң жарияланды. Аталған кездесу барысында тараптар 1 000 соғыс тұтқынын өзара алмастыруға және бітім туралы келіссөздерді жалғастыруға келісті.

Путин Ресей «арнайы әскери операция» деп атаған Украинадағы қақтығысты Ресейдің жоспарланған нәтижемен аяқтай алатын әлеуетке ие екенін айтты.

«Бұл нәтиже – осы дағдарысты туындатқан себептердің жойылуы, ұзақ мерзімді және тұрақты бейбітшіліктің орнауы, әрі Ресей мемлекетінің қауіпсіздігінің қамтамасыз етілуі» – деді Путин.

Сондай-ақ ол қақтығыс мақсаттарының бірі ретінде осы аймақтарда тұрып жатқан, ана тілі орыс тілі болып табылатын және Ресейді өз отаны деп есептейтін адамдардың мүдделерін қорғау екенін білдірді.