Ақ Үй сәрсенбі күні федералды мекемелерден алдағы аптада үкіметтің ықтимал жабылуы кезінде жаппай жұмыстан шығару жоспарын дайындауды сұрады. Бұл әрекеттің алдынғы үкімет жабылу кезеңдерінде байқалған уақытша ақысыз демалысқа жіберу шарасына ұқсамауы назар аударды.
Ақ Үйдің Басқару және бюджет басқармасы (OMB) сәрсенбі күні федералды мекемелерге жазбаша нұсқау жіберіп, АҚШ Конгресі федералды үкіметтің жұмысын жалғастыру үшін заң қабылдамаған жағдайда 1 қазанда қолданылуы мүмкін ерікті қаржыландыруға жататын бағдарлама, жоба және қызмет түрлерін анықтауды тапсырды.
Ақ Үй жіберген жазбада OMB: «Міндетті қаржыландыруға кірмейтін бағдарламалар үкіметтің жабылуынан ең көп зардап шегетін болады», -деді.
Ақ Үй үкіметінің жабылуын президент Дональд Трамптың федералды жұмыс күшін қысқарту мақсатымен пайдаланғаны әлде республикалықтардың қаржыландыру заңын қабылдатуға мәжбүрлеу мақсатында демократтарға қарсы жоғары тәуекелді келіссөз тактикасы ретінде қолданып жатқаны әзірге белгісіз.
Мекемелерге ұсынылған жұмыс күшін қысқарту жоспарын OMB-ге ұсыну, сондай-ақ қаржыландыру тоқтатылған жағдайда ақысыз демалысқа жіберілетін немесе осы рәсімнен тыс қалатын қызметкерлерді хабардар ету нұсқауы берілді.
OMB жазбасы туралы алғаш рет “Politico” журналы хабарлады.
Федералды жұмыс күшін қысқарту
Трамп сейсенбі күні үкіметті қаржыландыру ережесін талқылау үшін Конгрестегі демократ жетекшілерімен өтетін кездесуін тоқтатты. Бұл келесі аптада басталуы мүмкін үкіметтің ішінара жабылу қаупін арттырды.
Республикалықтар да, демократтар да қазіргі тығырық үшін бір-бірін айыптауда.
Трамп қаңтарда қызметіне кіріскен кезде саны 2,4 миллионға жететін федералды азаматтық жұмыс күшін «көп әрі тиімсіз» деп атап, оны қысқартуға бағытталған науқанды бастаған болатын.
Қызметкер басқару агенттігінің директоры Скотт Купор тамыз айында “Reuters” агенттігіне берген сұхбатында шамамен 300 мың федералды азаматтық қызметкердің 2025 жылдың соңына дейін жұмысынан шығарылатынын хабарлады.
Бұл қызметкерлердің шамамен 154 мыңы өтемақы алуға келісім берді. Олар федералды үкіметтің қаржы жылының соңғы күні (30 қыркүйек) АҚШ үкіметінің еңбекақы тізімінен шығарылмақ. Сонымен қатар бұл күн — Трамп пен Конгрестің үкіметтің жабылуын болдырмау үшін федералды шығындар бойынша келісімге келуі тиіс соңғы мерзім.
