Сейсенбі күні шенеуніктердің мәлімдеуінше, Үндістанның оңтүстігіндегі Телангана штатында дүйсенбі күні болған ірі жарылыс пен өрт салдарынан кемінде 36 адам қаза тапқан, шамамен 30 адам жарақат алған.

Өрт сөндірушілер штат астанасы Хайдарабадтан шамамен 50 шақырым қашықтықтағы өнеркәсіп аймағында болған апаттан кейін 34 жұмысшының күйіп кеткен мәйітін тапты. Телангана өртке қарсы қызметінің директоры Г.В. Нараяна Рао бұл ақпаратты “Associated Press” агенттігіне растады.

Рао тағы екі жұмысшының ауруханада күйік жарақаттарынан көз жұмғанын, “Sigachi Industries” компаниясына тиесілі дәрі-дәрмек зауытының үйіндісі әлі толық аршылмағанын және ішінде қалған жұмысшылардың бар-жоғы анықталып жатқанын айтты.

Жараланған отызға жуық жұмысшы ауруханаға жеткізілді. Рао: "Зауыттың бүкіл құрылысы опырылып түсті. Өрт сөндірілді, алдағы бірнеше сағат ішінде үйінді толығымен тазаланады деп үміттенеміз," – деді.

“Sigachi Industries” жарылыс пен өрттің себебі туралы түсініктеме бермегенімен, зауыттың негізгі өндірістік инфрақұрылымы бүлінгенін және нысанның жұмысы 90 күнге тоқтатылатынын хабарлады. Компания зауытта әдетте дәрі-дәрмек өндірісінде қолданылатын микрокристалды целлюлоза атты химиялық зат өндірілетінін мәлімдеді.