Австралия Премьер-министрі Энтони Албанезе геноцид жасаушы Нетаньяхудың Палестина мемлекетін мойындау шешімін «терроризмге қарсы ақымақ сый» деп атағанына қарамастан, өз үкіметінің мойындау шешімін қорғады.
Албанезе жексенбі күні Нью-Йорктегі БҰҰ-да журналистерге берген сұхбатында: «Австралия Палестинаны мойындау мәселесінде көптен бері елдегі екі партияның көзқарасына сай ұстаным танытты. Біз екі мемлекет негізіндегі шешімді қолдаймыз», – деді.
Ол сондай-ақ Австралияның 1948 жылы БҰҰ Израиль мемлекетін құруда маңызды рөл атқарғанын атап өтіп, «Екі мемлекеттің құрылуы сол кезде де қарастырылған болатын»,- деп қосты.
Премьер-министр атысты дереу тоқтатуға, тұтқындарды босатуға және Газаға гуманитарлық көмек жеткізуге шақырды.
Болашаққа бағытталған шешім
Албанезе бейбітшілікті тұрақтандыру үшін израильдіктер мен палестиналықтардың болашақта бейбітшілік пен қауіпсіздік жағдайында қатар өмір сүруіне мүмкіндік беретін ұзақ мерзімді шешімге бағытталған қадамдар қажет екенін айтты.
Албанезе жексенбі күні «X» әлеуметтік желісінде жасаған мәлімдемесінде: «Австралия Достастығы 2025 жылдың 21 қыркүйегінен бастап тәуелсіз әрі егемен Палестина мемлекетін ресми түрде мойындайды», – деді.
Оның айтуынша, бұл қадам палестиналықтардың өз мемлекетіне ие болуға деген заңды әрі ұзақ уақыттан бергі тілегі және Канада мен Ұлыбританияның шешімдерімен бірге екі мемлекет негізіндегі шешім үшін жаңа серпін беруді көздейтін халықаралық бастаманың бір бөлігі.
Сол күні Нетаньяху да Австралия, Ұлыбритания және басқа елдердің Палестинаны мойындау жөніндегі шешімін сынға алып, оны «терроризмге қарсы ақымақ сый» деп атады.
