Кубаның Жоғарғы соты бұрынғы Экономика министрінің тыңшылық жасау бойынша өмір бойына бас бостандығынан айырылғанын мәлімдеді. Бұл ˗ аралда соңғы жылдары бұрынғы жоғары лауазымды тұлғаға қатысты қозғалған ең ірі резонансты іс.
Жоғарғы сот дүйсенбі күнгі мәлімдемесінде бұрынғы Экономика министрі Алехандро Гиль Фернандеске пара алу, жалған құжат жасау және салықтан жалтару секілді басқа да қылмыстар бойынша өтіп жатқан бөлек сотта кінәлі деп танылғаннан кейін қосымша 20 жыл түрме жазасы тағайындалғанын хабарлады.
Гиль 2018 жылдан 2024 жылға дейін Экономика министрі қызметін атқарған және қызметінен босатылғанға дейін Мемлекет басшысы Мигель Диас-Канельдің ең жақын серіктестерінің бірі болған. Сондай-ақ ол 2019 жылы премьер-министрдің орынбасары болып тағайындалған еді.
Қызметтен алынғаннан бірнеше апта өткен соң Куба басшысы Гильдің үлкен қателіктерге жол бергенін және жемқорлықтың жазасыз қалмайтынын айтқан, бірақ нақты әрекеттері туралы ақпарат бермеген.
Кубаның Жоғарғы соты бұрынғы министрдің нақты не істегені немесе кімнің пайдасына тыңшылық жасағаны жөнінде ешқандай ақпарат бермеді.
«Associated Press» бұрынғы министрмен немесе оның қорғаушысымен байланысқа шыға алмады.
Гильдің ісі ˗ 2009 жылы сол кездегі вице-президент Карлос Лаге мен Сыртқы істер министрі Фелипе Перес Рокенің қызметтен алынуынан бергі шенеуніктерге қатысты қозғалған ең жоғары деңгейлі іс. Ол кезде іс құпия ақпараттың тарап кетуіне байланысты болған, бірақ олар сотталмаған еді.
Гиль 2021 жылы Кубада елдің ақша жүйесін біріктіруге бағытталған реформалардың, сондай-ақ ірі экономикалық өзгерістердің басындағы тұлға болатын. Оның кезеңінде экономикалық дағдарыс пен тауар тапшылығынан зардап шеккен Кубада инфляция күрт өскен еді.
