Төтенше жағдайларды алдын алу және әрекет ету басқармасының  (AFAD) хабарлауынша, Түркияда эпицентрі Стамбулдың Силиври ауданы болған 6,2 магнитудалы күшті жер сілкінісі тіркелді.

Жер сілкінісі сәрсенбі күні жергілікті уақытпен 12:49-да болды. Стамбул қаласы мен оған жақын аймақтарда қатты сезілген сілкінісінен тұрғындар үрейленіп, ғимараттардан сыртқа шықты.

Ал тағы бір жер сілкінісі сағат 13:02-де Мармара теңізінің Бююкчекмедже жағалауында 4,9 магнитудамен тіркелді.

AFAD барлық тиісті мекемелер мен жедел әрекет ету топтарының жұмылдырылғанын, ықтимал шығындарды анықтау және қоғамдық қауіпсіздікті қамтамасыз ету мақсатында жергілікті жерлерде тексеру жұмыстары жүргізіліп жатқанын хабарлады.

Мамандардың жағдайды белсенді түрде бақылап отырғаны және шұғыл әрекет ету шараларын үйлестіріп жатқаны атап өтілді. Қазіргі уақытқа дейін адам шығыны немесе ауқымды залал туралы мәлімет түскен жоқ.

Түркия Президенті Режеп Тайып Ердоған жер сілкіністеріне қатысты жасаған мәлімдемесінде: «Барша азаматымызға амандық тілеймін, жағдайды жіті бақылап отырмыз», – деді.