Түркия Израиль премьер-министрлігі тарапынан Сирияға қатысты жасалған мәлімдемелерді жоққа шығарып, олардың Израильдің Сирияның егемендігі мен аумақтық тұтастығына бағытталған «заңсыз» әуе шабуылдарын заңдастыруды көздейтінін мәлімдеді.
Түркия Президент аппараты жанындағы Коммуникация басқармасы «X» әлеуметтік желісіндегі мәлімдемесінде: «Израиль премьер-министрлігі алға тартқан негізсіз мәлімдемелер Израильдің Сирияның егемендігі мен аумақтық тұтастығына бағытталған заңсыз әуе шабуылдарын ақтауға бағытталған», — деді.
Идлибтегі әуе шабуылдары
Сейсенбі күні Израильге тиесілі әскери ұшақтар Сирияның солтүстік-батысындағы Идлиб уәлаятында орналасқан Әбу Зухур әскери әуе базасының ұшу-қону жолағына сегіз рет әуе соққысын жасаған болатын. Шабуыл салдарынан әуежай инфрақұрылымына зақым келді.
Анкара тағылған айыптардың Нетаньяхудың Израильдегі сайлау қарсаңында аймақта «экспансиялық әрі тұрақсыздық туғызатын саясатын» жалғастыру ниетінен туындап отырғанын мәлімдеді.
Мәлімдемеде: «Түркия әлем елдерінің басым көпшілігі секілді өңірімізде бейбітшіліктің тұрақты орнағанын қалайды. Бұған апарар жалғыз жол — Нетаньяхудың агрессиялық әрі қысым көрсетуге негізделген саясаттан бас тартып, халықаралық құқықты құрметтеуі», — делінген.
Анкара сондай-ақ Сирияда бейбітшілік, тұрақтылық пен өркендеуді қамтамасыз ету үшін Сирия үкіметімен ынтымақтастықты жалғастыратынын қайталады.
Мәлімдемеде: «Түркия Сирияда бейбітшілік орнату үшін Сирия үкіметімен заңды негізде ынтымақтастығын табандылықпен жалғастырады және Сирияны тұрақсыздандыруға ешқашан жол бермейді», — делінген.
