Ирандық ақпарат құралдарының хабарлауынша, АҚШ пен Израильдің әуе шабуылдарынан кейін Шығанақтағы Харк аралында жарылыс болды.

“Mehr” ақпарат агенттігі сейсенбі күні АҚШ пен Израиль жойғыш ұшақтары аралға бірнеше әуе соққысын жасағанын, соның салдарынан көптеген жарылыс болғанын хабарлады. Алайда “Reuters” агенттігіне сұхбат берген америкалық шенеунік әскери нысандарға бағытталған бұл қосымша шабуылдар мұнай инфрақұрылымына әсер етпегенін айтты.

Аты-жөнін көрсетпеуді сұраған шенеуніктің айтуынша, шабуылдардың кем дегенде бір бөлігі бұрын да соққы берілген аймақтарды нысанаға алған және операция сейсенбі күні таңертең ерте орындалған. Қаза тапқандар немесе зақымдану деңгейі туралы әзірге нақты ақпарат жоқ.

Өткен аптада АҚШ президенті Дональд Трамп Харк аралындағы барлық әскери нысандардың «толығымен жойылғанын» жариялаған болатын. Сонымен қатар Трамп Иран мұнайын «бақылауға алу» ниетін білдіріп, елдің басты мұнай экспорттау терминалы саналатын Харк аралын иелену қарастырылып жатқан нұсқалардың бірі екенін алға тартты.