Иран Ұлттық қауіпсіздік жоғары кеңесінің бас хатшысы Мохсен Резаи АҚШ президенті Дональд Трампты Иран бірнеше рет мәлімдеген жеті талапты қабылдауға шақырды.

Мохсен Резаи «X» әлеуметтік желісіндегі парақшасында Дональд Трамптың Иранмен жүргізіліп жатқан келіссөздер туралы мәлімдемелеріне пікір білдірді.

«Иранға қарсы жүргізілген соғыс АҚШ үкіметін әлдеқашан күйретті. Алайда Вашингтон жеңілгенін мойындағысы келмейтін құмар ойыншыдай әлі де жанталасып жатыр», – деген Резаи АҚШ-ты жеңілгенін мойындауға шақырды.

Трамптың Иранмен келіссөздер жақсы жүріп жатқаны туралы мәлімдемесіне тоқталған Резаи мұндай келіссөздерді «ойдан шығарылған», ал олар туралы хабарларды «жалған» деп атады.

«Батыс Азиядағы жаңа тәртіпті мойындаудан бас тартуды тоқтат. Иран бірнеше рет ұсынған жеті талапты қабылдайтын уақыт жетті», – деді ол.

Бұған дейін АҚШ президенті Дональд Трамп Ақ Үйде өткен баспасөз мәслихатында Иранмен келіссөздердің жақсы жүріп жатқанын, бұл үдерістің жақын арада аяқталатынына үміттенетінін және жаңа әскери операция жүргізудің қажеті жоқ деп санайтынын айтқан болатын.

Тегеранның Вашингтонға ұсынған жеті талабы мыналарды қамтиды: теңіз блокадасын алып тастау, Ормуз бұғазы арқылы сауда және мұнай тасымалдайтын кемелердің қауіпсіз өтуіне кепілдік беру, біржақты санкцияларды жою, мұнай экспортына қатысты санкциялардан босату, бұғатталған активтерді босату, ядролық материалдардың Иран аумағында сақталуын қамтамасыз ету, соғысты тоқтату.