Жексенбі күні “CBS” телеарнасына берген сұхбатында Кушнер АҚШ, Израиль және араағайын елдердің Газа аумағындағы келісімнің орындалу барысын, соның ішінде ХАМАС-тың қолындағы израильдік тұтқындар мен қаза тапқандардың мәйіттерін қайтару үдерісін бірлесе бақылап отырғанын атап өтті.

«Араағайындар бізге жеткізген мәліметтерге сәйкес, әзірге олар келісімге адал қалып отыр», - деді Кушнер. ХАМАС-тың келісімді толық орындап жатқаны жайлы сұраққа ол: «Бұл кез келген сәтте бұзылуы мүмкін, бірақ қазіргі кезде олардың өз міндеттемелеріне адал болуға тырысып жатқанын байқап отырмыз», - деп жауап берді.

Трамп әкімшілігінің бейресми кеңесшісі ретінде қызмет ететін Кушнер Вашингтонның “екі тарапты да бірін-бірі айыптаудан гөрі шешім табуға бағытталған белсенді ұстанымға” ынталандырып отырғанын айтты. Ол бітімнің алғашқы кезеңінде тұрақтылықты сақтау басты мақсат екенін атап өтті.

Кушнер сондай-ақ қаза тапқан тұтқындардың денесін қайтару ісінде ілгерілеу Израиль өкілдері мен Катар, Мысыр және Түркия тарапынан делдалдық арқылы ХАМАС өкілдеріне ақпарат жеткізу жолымен мүмкін болатынын айтты.

Сонымен қатар Трамп Газа бітімінің Израильдің ондаған адамның өмірін қиған әуе соққыларына қарамастан күшінде қалып отырғанын мәлімдеді және Вашингтонның Израиль мен ХАМАС арасындағы тыныштықты сақтауға мүдделі екенін хабарлады.

АҚШ-тың Таяу Шығыс жөніндегі арнайы өкілі Стив Уиткофф Газада соғыстан кейінгі қайта қалпына келтіру үшін “негізгі жоспар” дайын екенін, бұл процестің араб және халықаралық серіктестердің қолдауымен ашық әрі айқын түрде жүзеге асатынын айтты.

“CBS” телеарнасына берген сұхбатында Уиткофф шамамен 50 миллиард доллар көлемінде бағаланған бұл жоспардың бітімнен кейін Газа инфрақұрылымын қайта қалпына келтіруді көздейтінін мәлімдеді.

«Бұл өте қымбат жоба болады деп ойлаймын. Болжам шамамен 50 миллиард доллар шамасында, сәл аз не көбірек болуы мүмкін. Бірақ бұл аймақ үшін аса үлкен сома емес. Бұл іске кірісуге дайын үкіметтер бар», - деді Уиткофф.