Бүгін жаңа оқу жылының басталуы жоспарланған оккупациядағы Шығыс Иерусалимде жекеменшік Палестина мектептері Израильдің қысымына наразылық ретінде оқу үдерісі екінші хабарламаға дейін басталмайтынын мәлімдеді.

Оккупациядағы Шығыс Иерусалимде орналасқан жекеменшік Палестина мектептері бірлескен мәлімдемесінде мұндай шешім Израильдің оккупациядағы Батыс Шериядан келетін мұғалімдер мен қызметкерлерге кіруге рұқсат бермеуіне байланысты қабылданғанын хабарлады.

Мәлімдемеде: “Көптеген мұғалім, мұғалім көмекшілері және қосалқы қызметкерлердің кіру рұқсаттары алдын ала ешқандай ескертусіз әрі күтпеген жерден ұзартылмағандықтан көптеген білім беру қызметкерлері жұмыс орындарына жете алмады. Бұл жағдай жаңа оқу жылының басталуына кедергі келтірді”, - делінген.

Сондай-ақ Израильдің қызметкерлерге кіруге рұқсат бермеуіне байланысты мектептердегі денсаулық сақтау, тазалық және қауіпсіздік бойынша дайындықтардың тиісті деңгейде жүргізілмегені айтылды. Мәлімдемеде «Иерусалимдегі барлық мұғалімдер мен қызметкерлердің кіру рұқсаттары толықтай ұзартылғанға дейін оқу үдерісін тоқтата тұру туралы шешім қабылданғаны» атап өтілді.

Палестина мектептеріне «Израиль оқу бағдарламасын» міндеттеу

Палестина әкімшілігіне қарасты Иерусалим губернаторлығы өз мәлімдемесінде Израильдің Иерусалим муниципалитетіне қарасты мектептерде 45 мыңнан астам палестиналық оқушыға Израильдің оқу бағдарламасын міндеттеп отырғанын хабарлады.

Мәлімдемеде бұл қадам «Палестина болмысын жою, ұлттық тарихи баяндауды бұрмалау және иерусалимдік оқушылардың өз тарихын, тілін және ұлттық тиесілігін сақтайтын ұлттық білім алу құқығына жасалған тікелей шабуыл» деп бағаланды.

Израильдің “Haaretz” газеті оккупациядағы Шығыс Иерусалимде 120 мың оқушы бар екенін және олардың 38 пайызы Израильдің Иерусалим муниципалитетіне қарасты мектептерде білім алатынын жазды.

Хабарда бұл мектептерде Израильдің оқу бағдарламасының енгізілуі 1967 жылғы оккупациядан бері алғаш рет жүзеге асып отырғаны айтылды.