Түркия Үндістанның Пәкістандағы бейбіт тұрғындар мен азаматтық инфрақұрылымға бағытталған шабуылын қатаң айыптады. “Бұл қадам екі көрші ел арасындағы толыққанды соғыс қаупін арттырады” деп ескертті.
Түркияның Сыртқы істер министрлігі бұл шиеленісті «арандатушылық» деп атап, екі тарапты ұстамдылық танытып, ақылмен әрекет етуге шақырды.
«Біз бейбіт тұрғындар мен азаматтық инфрақұрылымға бағытталған мұндай арандатушылық қадамдарды, сондай-ақ шабуылдарды айыптаймыз», – делінген министрліктің мәлімдемесінде. Сонымен қатар «Үндістанның өткен түнде жасаған шабуылы толыққанды соғыс қаупін арттырады» деп айтылған.
Түркия жағдайдың тез нашарлауына байланысты терең алаңдаушылық білдіріп, шиеленісті азайту және одан әрі қақтығыстардың алдын алу үшін шұғыл шаралар қабылдауға шақырды. Министрлік болашақта осындай оқиғалардың алдын алу үшін, әсіресе терроризмге қарсы күрес саласында қажетті механизмдерді құрудың маңыздылығын атап өтті.
Анкара сондай-ақ 22 сәуірдегі террористік шабуылға қатысты тергеу жүргізу туралы Пәкістанның талабын қолдап, айқындық пен аймақтық ынтымақтастыққа деген ұстанымын қайталады.
«Біз аймақтағы шиеленісті мүмкіндігінше тезірек азайту үшін шаралар қабылданады деп күтеміз», – делінген мәлімдемеде. Сонымен қатар Түркия жағдайды мұқият бақылап отырғанын атап өтті.
Екі ядролық держава арасындағы шиеленістің күшеюі
“Үндістан Пәкістан мен Пәкістан әкімшілік ететін Кашмирдегі алты нысанға соққы жасап, бейбіт тұрғындарды, соның ішінде балаларды өлтіріп, мешіттерге зиян келтірді” деп хабарлады Пәкістан билігі.
Пәкістан Бахавалпур, Муридке, Музаффарабад, Котли, Баг және Ахмадпур Шығыс аймақтарына әскері шабуыл жасалғанын мәлімдеді. Қаза тапқандар арасында 3 жасар қыз, 16 жасар қыз және 18 жасар жігіт бар. Ондаған адам жарақат алды, ал екі адам із-түзсіз жоғалып кетті.
Генерал-лейтенант Ахмед Шариф Чаудхри әртүрлі қарулардан 24 соққы тіркелгенін, олардың тығыз қоныстанған аудандар мен діни орындарға келіп тигенін айтты. Жауап ретінде Пәкістан бес үнді әскери ұшағын және бірнеше дронды атып түсіргенін мәлімдеді.
