Қытай Сауда министрлігі таратқан мәлімдемеде Қытайдың АҚШ Жоғарғы сотының кедендік бажға қатысты шешімін «толық қарастырғаны» айтылып, Вашингтонды сауда серіктестеріне қолданылып отырған «тиісті біржақты кедендік баж шараларын» алып тастауға шақырды.
Дүйсенбі күні жасалған бұл мәлімдемелер АҚШ Жоғарғы сотының АҚШ президенті Дональд Трамптың ғаламдық сауда соғысы аясында бәсекелес Қытайға қарсы енгізген көптеген кедендік салықты жойып, оған ауыр соққы бергенінен бірнеше күн өткен соң жарияланды.
Шешім жарияланғаннан бірнеше сағат өткен соң Трамп сейсенбі күнінен бастап барлық елден келетін АҚШ импортына жаңа 10 пайыздық кедендік баж енгізілетінін айтса, сенбі күні бұл мөлшерлемені 15 пайызға дейін көтерді.
Министрлік сондай-ақ «Қытай бұл жағдайды жіті қадағалап, өз мүдделерін табанды түрде қорғайды» деп мәлімдеді.
Трамп болса, 31 наурыз – 2 сәуір күндері Қытайға баруды жоспарлап отыр.
Сенбі күні жасалған хабарлама соңғы бір жыл ішінде Трамптың командасы АҚШ-қа тауар экспорттайтын елдерге қатысты белгілеп, кейін өзгерткен немесе жойған көптеген кедендік салығын қамтыған, жылдам өрбіген үдерістің соңғы кезеңі болды.
Көптеген ел Жоғарғы сот шешімі мен Трамптың одан кейінгі кедендік баж туралы мәлімдемелеріне байланысты тиісті жұмыс жүргізіп жатқанын хабарлады.
АҚШ Сауда өкілі Джеймисон Грир жексенбі күні АҚШ медиасына берген сұхбатында сот шешіміне қарамастан елдің Қытаймен, Еуропа Одағымен және басқа да серіктестермен жасалған сауда келісімдері жалғасатынын айтты.
